Herold

Drangedal har fått ein ny SLT-koordinator, og det er ingen ringare enn Siri Martine Fjerdingstad (41). Med eit brennande engasjement for barn og unge, og solid erfaring frå skule og vaksenopplæring, gler ho seg til å ta fatt på den viktige oppgåva med å samordne førebyggjande arbeid i kommunen.

Siri Martine er eit kjent ansikt for mange i Drangedal. Ho bur på Bråtheia, er gift og mor til tre barn i alderen 6 til 15 år. Til dagleg jobbar ho i vaksenopplæringa og flyktningtenesta som programrådgjevar, men nå har ho altså takka ja til ei ny og spanande rolle.

Ein etterspurd ressurs

– Det var eigentleg slik at eg blei spurt om eg ville ta rolla, fortel Siri Martine med eit smil.

Og det er kanskje ikkje så rart, for ho beskriv seg sjølv som engasjert, imøtekommande og sosial.

– Eg likar å jobbe med menneske, smiler ho.

Hjartet hennar bankar særleg for ungdommen. Med bakgrunn som lærar, der ho har jobba både i ungdomsskulen i Skien og Drangedal, har ho sett kor viktig førebyggjande arbeid er.

– Ungdommen er jo framtida vår! Det er så viktig med gode relasjonar og å skape nettverk og relasjonsbygging inn mot barn og unge. Eg tenkte at dette var ein fin kombinasjon med den rolla eg allereie har, der eg jobbar med vaksne. Nå får eg eit spekter, seier ho entusiastisk.

Kva er SLT?

SLT står for «Samordning av lokale rus- og kriminalitetsførebyggjande tiltak for barn og ungdom». Det er ein tretrinnsmodell utvikla av Kriminalitetsførebyggjande råd, og Siri Martines jobb blir å vere eit bindeledd mellom desse nivåa.

– Eg skal koordinere arbeidet og få dei forskjellige aktørane til å snakke saman og samarbeide. Det er mange gode tiltak som allereie blir gjort rundt omkring i tenestene i kommunen, men ved å bli kjende med kvarandre på tvers, og vite kva vi gjer på dei ulike einingane, trur eg vi kan bli sterkare saman, forklarer ho.

Samarbeid er nykkelen

Siri Martine starta i den nye rolla si på nyåret, og er framleis i startgropa med å få oversikt og bygge opp teamet. Eit viktig samarbeid blir med politikontakten i kommunen Marie Konmo Enger.

– Marie er ei viktig brikke. Ho har mykje god informasjon om kva som rører seg, og kva som er viktig å fokusere på. Eg er heilt avhengig av å ha ein god sparringpartner, seier ho.

Ho trur på at betre samarbeid kan føre til at det å vera ung i Drangedal blir endå betre.

– Eg har tru på samarbeid. Saman er me sterkare, og det blir god informasjon ut til alle – til ungdommen sjølv, og til foreldre, smiler ho.

Eigne erfaringar kjem godt med

Med tre eigne barn i alderen 6 til 16 år, har Siri Martine fyrstehands kjennskap til ungdomslivet og kva som rører seg.

– Eg er jo midt i den tida sjølv, så det er lærerikt for meg som mamma òg. Eg får jobbe med dette både på jobb og heime!

Ho trekk fram ungdomsklubben som eit viktig møtepunkt for ungdommen, og understrekar at det er mange som kan bidra inn mot ungdom – og ikkje minst, ungdommen sjølv.

Siri Martine gler seg til å sjå kva arbeidet som SLT-koordinator kan få til, og er klar for å bidra til eit trygt og godt oppvekstmiljø for alle barn og unge i Drangedal.