Herold

Kva vinn det norske samfunnet på å senda desse brørne ut av landet no? Absolutt ingenting.

Det er absurd: To unge menn som har budd her i årevis, teke fagbrev, studert, skaffa seg jobb og blitt ein naturleg del av samfunnet vårt, får liva sine øydelagde over natta.

Kvifor? Fordi dei som mindreårige asylsøkarar gav uriktige opplysningar om kva side av grensa dei vaks opp på: Dei sa dei var frå Afghanistan, men var fødde og oppvaksne i eit flyktningmottak for afghanarar i Pakistan.

Dom i saka om Sawab og Hameed: – Heilt forferdeleg

Brørne fekk i september 2024 beskjed om at dei måtte forlata landet. Dei gjekk til sak for å omgjera vedtaket, og vann i fjor vår mot Utlendingsnemnda (UNE) etter tre dagar i Oslo Tingrett. UNE anka, og i går kom dommen: Borgarting lagmannsrett slår fast at tilbakekallinga er gyldig.

Dommen er heilt sikkert juridisk korrekt. Men spørsmålet me som samfunn må stilla oss, er om dette er rettvist. Er det rimeleg at ein feil du gjer som 14-åring på flukt skal henga ved deg som ein ulegeleg kreftbyll for resten av livet?

Då Hordaland skreiv om Sawab i 2024, vakna det lokale engasjementet: «Han er eit arbeidsjern og ein skikkeleg god kollega. Det er heilt utruleg at ein slik ressursperson må ut av landet», sa kollegaane hans til Hordaland den gongen.

Støttekonsert for Sawab og Hameed: – Eg og bror min er veldig takknemlege

Folk reagerte fordi dei såg ein ung mann som ville noko. Ein som tok fagbrev, fekk seg jobb og bidrog i høgste grad til det norske samfunnet. Brørne bur saman i Fyllingsdalen. Sawab jobbar i eit byggefirma i Bergen, medan Hameed studerer.

«Slike gutter det vil gamle Norge ha». Med unntak av at dei heiter Hameed og Sawab, og at dei i ein pressa situasjon i tidleg tenåra kom i skade for å gjera ein feil dei no blir iskaldt straffa for.

Kva vinn det norske samfunnet på å senda desse brørne ut av landet no? Absolutt ingenting. Me mistar arbeidskraft, skatteytarar, gode kollegaer og vener. Det einaste staten oppnår, er ein prinsipiell siger for eit firkanta regelverk.

Ikkje berre blir Sawab og Hameed rivne vekk frå liva sine – dei blir i same slengen sparka medan dei ligg nede: Brørne er dømde til å betala over 200.000 kroner i sakskostnadar til staten. Berre eg som får ein ekkel smak i munnen av dette?

Viss denne dommen blir ståande, viser det eit kynisk og iskaldt system blotta for sunn fornuft og skjønn.

Eit slikt Norge er ikkje eit Norge eg vil ha.

Denne veka tek Sawab (23) fagbrev. Neste veke må han ut av landet

No er brørne ferdige i retten for andre gong: – Det kan gå alle vegar

No må Sawab og Hameed i retten igjen. – Me er litt nervøse

Utlendingsnemnda ankar dommen i saka mot Sawab og Hameed