Herold

Ein forstår godt at kommunen ønskjer seg fleire innbyggjarar (15.000). Det alternativ som no blir pressa fram er å byggja stadig fleire hus og einingar i Rosendal. Alternativet som bør fram, er å løfta blikket sitt og heller sjå heile Kvinnherad som éin kommune. Mitt forslag: Kommunen kunne vedteke at kvar den som kjøper eller får seg tomt og byggjer seg hus eller leilighet i Kvinnherad (og pliktar seg til å flytta til kommunen) får tildelt ein sum pengar, kanskje 500-700.000. Byggjer dei i tillegg i si eiga heimbygd får dei seg kanskje ei særs rimeleg tomt av si eiga slekt eller vener. Gjort slik risikerer ein at det skapar ekstra liv i leikarringen, og dei som etterkvart blir eldre får ei visse om at dei har slekt og vener like nær seg, noko som vil gje dei auka livskvalitet.

Løftar ein blikket litt opp og ser mot Malmangernuten, så ser ein kor eigna denne er for ein Skylift. Lothepus planlegg ein slik i Odda, men har fått nei av omsyn til villreinstamma. Han har gode støttespelarar i Eide-Knudsen brørne som eig det no særs veldrivne Rosendal Fjordhotel. Kvinnherad kommune og dei fonda som høyrer heime i Kvinnherad, samt SKL, Statkraft og Statnett, hadde gjerne funne det lurt å spytta i ein slant? Det kan gjerne byggast eit lite visningssenter der også: «Her kjem krafta di frå!» Ein ting er rimelig sikkert: Skylift i Rosendal vil truleg bli meir lønsamt enn nokon annan plass i Hardangerfjorden!

Til slutt: Kommunen og lagslivet i Rosendal og omegn burde motiverast endå meir til å få i gang bygging av ein slik arena som Kvinnherad Arena. Rosendal Arena kling godt. Med Rødne si direkterute til og frå Bergen så opnar det seg ein stor marknad for kurs, konferansar, idrettsarrangement og mykje anna. Om det gode lagslivet i Rosendal kunne fått ein del at den potensielt gode innteninga, for å ta seg av ungdommar som gjerne då trygt kan reisa på si første overnattingsutflukt utan foreldre, vil det skapa ein god og langsiktig effekt. Kall det gjerne ein slik «Daytona Beach»-effekt. Dei som har hatt gode og spennande opplevingar i ungdomen ein stad, har ein tendens til å komma tilbake til same staden igjen og igjen, resten av livet sitt.

NB: Det som er nemnt her må ikkje på nokon som helst måte lastast eller tilskrivast FrP. Dette er skrive heilt på eiga rekning og risiko!