Herold

Det er krevjande å lesa eit innlegg der ein blir møtt med påstandar om at motførestillingane til eit klårt fleirtal i Vinje kommunestyre er baserte på kjensler og manglande forståing av saka. Dette handlar ikkje om kjensler. Det handlar om lovpålagde krav og fagleg forsvarlege helsetenester.

Det er eit lovpålagt ansvar å sørge for at jordmødrene har ein fagleg forsvarleg arbeidssituasjon. Det ansvaret blir ikkje ivareteke ved å legge Tinn inn under dagens følgje- og beredskapsteneste i Vest-Telemark. Avstandane er for lange og risikoen for samtidigheitskonfliktar aukar. Dette er ikkje synsing – det handlar om krav til forsvarleg drift.

Samtidig er det heilt tydeleg i regelverket at gravide som har meir enn 90 minutt reiseveg til fødestad, har rett på følgje- og beredskapsteneste. Om dagens organisering i Vest-Telemark blir avvikla utan at eit likeverdig tilbod er på plass, så ivaretek ikkje sjukehuset sitt lovpålagte krav.

Difor reagerer vi sterkt når det blir framstilt som om kritikken kjem av misforståingar eller følelsesbaserte argument. Vi kjenner saka godt. Vi kjenner kvardagen i tenesta. Og vi kjenner dei faglege og juridiske rammene som gjeld.

Dette handlar ikkje om å vere mot samarbeid eller mot løysingar på tvers av kommunar. Det handlar om å sikre at både dei gravide og jordmødrene får eit trygt, forsvarleg og lovmessig tilbod.

Vi er leie av å bli framstilte som om vi ikkje forstår saka. Tvert imot er det nettopp forståinga av alvoret og ansvaret som gjer at vi seier i frå.

Ane Killingtveit og Åse Versto Kringlegarden

kommunestyrerepresentantar for Vinje Senterparti

(innlegget ble lagt ut på nettsida til Vest-Telemark Blad først)

– Oppsigelsen fra Vinje medfører at tjenestene kan bli dårligere for alle