Tenåring fengsla i ei veke for drapsplanlegging
Politiet har pågripe ein tenåring for «forbund om drap». Laurdag blei han varetektsfengsla i ei veke.
Laurdag vil Vest politidistrikt fengsle ein person for «forbund om drap».
Det betyr at to eller fleire personar lagar ei avtale om å utføre eit drap eller valdshending.
Den sikta erkjenner ikkje straffskuld. Det opplyser forsvararen.
– Han erkjenner ikkje straffskuld etter siktinga. Han har gitt ei forklaring til politiet, og innhaldet i den ønskjer eg ikkje å kommentere på noverande tidspunkt, seier forsvarar Tiril Røkke til NRK.
Advokat Tiril Røkke forsvarar mannen.
BT: 16-åring med valdshistorikk
Den sikta er ein 16 år gamal gut frå Bergen, skriv Bergens Tidende.
Ifølge avisa har han vore under etterforskinga for ei rekke valds- og trugselsaker og er kjent for politiet. Den siste tida har han vore under barnevernets omsorg og har budd på en institusjon det siste året. Han er ifølge BT sikta i fleire valdssaker.
Påtalemakta bad om to vekers fengsling for tenåringen, men tingretten meinte at ei veke var nok.
Forsvarar Røkke opplyser laurdag ettermiddag at klienten er varetektsfengsla i ei veke.
Ho opplyser at han etter forholda har det greitt, men at han motsette seg å bli varetektsfengsla og kravde å bli lauslaten.
Det var BA som først melde om saka.
Lukka dører i retten
På rettsmøtet i dag var dørene lukka.
Vest politidistrikt assisterer berre Kripos i fengslingsmøtet, og politiadvokat Jørgen Henriksen vil derfor ikkje kommentere saka.
– Vi vil varetektsfengsle i to veker med brev- og besøksforbod, seier pressekontakt i Kripos, Jonas Fabritius Christoffersen.
Korkje Kripos eller Vest politidistrikt vil kommentere spørsmål om andre involverte.
– Av omsyn til vidare etterforsking ønsker vi ikkje å gå inn i ytterlegare detalj om saka, seier Christoffersen.