Herold

To personar som var i personbilen blir omtala som kritisk skadde.

Vest politidistrikt melde klokka 13:56 fredag at det har vore ei trafikkulykke på R134 i Vågslidtunnelen.

Det skal visstnok vere snakk om front-mot-front mellom bil og vogntog.

– Involverte personar skal vere vakne og medvitne. Skjedd inne i tunnelen, opplyste operasjonsleiar i Vest politidistrikt, Knut Dahl-Michelsen.

Ulykka har skjedd i Sør-Øst politidistrikt, i Vinje kommune, like over grensa frå Vest politidistrikt. Det er sendt ressursar frå begge politidistrikta.

Alle naudetatane rykte ut til ulykka som framstår alvorleg.

Det var to personar i personbilen. Ein person var på eit tidspunkt fastklemd, men blei frigjort.

Dei blir omtala som kritisk skadde og er sende til sjukehus med luftambulanse.

Vegtrafikksentralen melde klokka 14:25 at tunnelen er stengd i begge retningar som følge av trafikkulykka. Det er venta å vere stengd lenge.

Seinare på ettermiddagen fredag opplyser politiet at Ulykkesgruppa til Statens vegvesen er på veg til staden for å undersøke hendinga. Politiet arbeidet med å kartlegge hendingsforløpet.

Bilbergar er på plass på staden.

Førar av lastebilen er fysisk uskadd, opplyser politiet, som avhøyrer vitne til hendinga.

– Det framstår som personbilen har kome over i motgåande køyreretning. Ulykkesgruppa er på veg til staden for å undersøke hendinga. I forbindelse med undersøking på åstaden er det per no truleg at vegen er stengd til klokka 19:00, opplyser operasjonsleiar i Sør-Øst politidistrikt klokka 16:55.

Kl 19.30 meldes det at vegen fremdeles er stengt og at opprydningsarbeid pågår.

Kl 20.58 meldes vegen åpnet.