Herold

Folk og næringslivpå Vestlandet stussar. Har Arbeidarpartiet, styringspartiet, gløymt eller gøymt oss vekk?

Fleire av oss begynte å ane uro sist haust då Ap la fram sitt første budsjett: her hadde dei gløymt eller gøymt vekk lovnader om kutt i studiegjeld for distriktsstudentar og samme skjedde med lovnader om låge ferjeprisar på kysten. Stoltenberg og Støre måtte gå kanossagang til Stortinget og seie seg leie for attgløyma si.

Så kom saka om høge drivstoffprisar som særleg råkar utkant-Norge der alternativ framkome som tog og godt utbygd kollektivtransport ikkje finst. Igjen måtte AP bli instruert av fleirtalet på Stortinget til ny kanossagang.

Og om ikkje dette var nok strekar i grusen for folk og næringsliv på Vestlandet, lyser samferdsleministeren ut anbod for FOT-rutene våre med kraftig reduksjon i setekapasitet på flyrutene. Dette endar med eit flybrøl i vest der og lokale Ap-folk tek del og reiser til sine partivener i Oslo for å sette foten ned for eit distriktsfiendtleg flyanbod, men til inga nytte. Ein samla opposisjonen på Stortinget tek kjapt saka i sine hender og må instruere statsråden om å trekke anbodet attende, og lyse ut ein ny runde med setekapasitet som i dag.

Men denne meiningsløysa frå Ap stoggar ikkje her: no har det lokale Ap-laget funne ut at ein områdeplan dei har vore med å stemme for tidlegare, vert lagt til sides av dei når ein no tek til på detaljreguleringa. Eg tenkjer sjølsagt på Måsholmutbygginga der næringsutvikling og arbeidsplassar i den marine verksemdsklynga i Gunhildvågen vert sett i spel. Så det Ap sentralt ikkje stoggar i vest, det greier lokalt Ap å stogge.

Så eg stiller spørsmålet igjen: kva skjer med styringspartiet Ap på Vestlandet?