Herold

Bygdeutviklingsutvalet fordelte tysdag midlar til ei rekkje lokale føremål. Både badeplassen i Agnavika, lokale festivalar og senioruniversitetet fekk pengar støtte til aktivitetar og utstyrskjøp.

Sakene vart vedtekne på ein god times tid, og alle vedtaka var samrøystes.

Støtte til kultur og idrett

Bygdeutviklingsutvalet har fått eit utvida ansvar for å behandla søknader om støtte etter vedtak i kommunestyret. Den samla økonomiske ramma for året er på 570.000 kroner.

For å sikra ein god overgang til den nye ordninga, vert søknadene behandla i mai dette året. Frå neste år vert det faste søknadsfristar med behandling i mars og september, går det mellom anna fram av sakstilfanget.

Betre tilrettelegging i Agnavika

Stanghelle Vellag fekk 15.000 kroner til oppgradering av badesklieområdet i Agnavika på Stanghelle. Tiltaket handlar om å føra fram vatn til badesklia. Det skal dessutan kjøpast inn materialar til mindre tilrettelegging og trygging rundt sklia. Alt saman er gjort for å fremja allmenne aktivitetstilbod i lokalmiljøet.

Det er sett som vilkår at vellaget har ein avtale med kommunen om tilrettelegging før arbeidet startar. Eventuelt nødvendige løyve etter plan- og bygningslova må også vera på plass.

Festivalar får draghjelp

Elvebrusfestivalen og Vintertreffet på Vaksdal er dei to aktørane som fekk dei største enkeltsummane i denne runden. Begge desse arrangementa fekk 30.000 kroner kvar i støtte. Pengane vert gjevne som eingongsstønad, og det skal leverast ein rapport etter at arrangementa er ferdige.

Daledagane fekk 15.000 kroner til sitt arrangement. Den same summen fekk Trine Duesund for konsert og albumlansering. Stanghelle kultur fekk 10.000 kroner til gjennomføring av sine kulturarrangement.

Utstyr til seniorar og idrett

10.000 kroner vart løyvt til innkjøp av teknisk utstyr til Vaksdal Senioruniversitet. Midlane skal nyttast til å kjøpa inn projektor og PC som skal brukast på arrangementa deira.

Stanghelle Idrettslag og Bergsdalen Idrettslag fekk støtte til Bergsdalen halvmaraton i juni. Løyvinga er på inntil 20.000 kroner til løpet og investering i utstyr. Pengane skal mellom anna dekka startnummer, tryggleiksvestar og T-skjorter.

Ein del av støtta til halvmaratonet skal gå til eit eige tidtakarsystem. Dette systemet er rekna som ei investering for framtidig bruk i idrettslaga. Kostnadane for systemet er sett til 30.000 kroner.

Tildelingane:

• Elvebrusfestivalen: 30.000 kr.
• Vintertreffet: 30.000 kr.
• Bergsdalen halvmaraton:Inntil 20.000 kr.
• Daledagane:15.000 kr.
• Konsert/albumlansering: 15.000 kr.
• Stanghelle Vellag: Inntil 15.000 kr (Agnavika).
• Vaksdal Senioruniversitet:10.000 kr (projektor og PC).
• Stanghelle Kultur:10.000 kr.

Samla ramme for Bygdeutviklingsutvalet i år er 570.000 kr