Herold

Få eit eigarforhold til sektoren, og tenk over kva kvalitet de vil gje born og unge i Ullensvang.

I rådmannen sitt forslag til budsjett er det for 2026 foreslått ein reduksjon på 16 årsverk i oppvekstsektoren. Dette utgjer ei innsparing på 16 millionar kroner, men også slik me ser det, ein kraftig reduksjon av tenestetilbodet til barn og unge i kommunen vår.

Mistanken vår er at med ein barnehagesektor som skrik etter personell, så vil kutta verte teken hovudsakeleg i skule. Me vil gjere det klinkande klart at ein reduksjon på 16 årsverk vil redusere kvaliteten betrakteleg i sektoren, og når oppvekstsjefen stadig trekk fram utfordringar med yngrebølga, så har me vanskar for å sjå at kuttforslaget er forsvarleg.

I eit forsøk på å berolige dei tilsette er det sagt at ingen skal mista jobben, men at kutta skal takast ved naturleg avgang. Vil det då bety at flaks/uflaks avgjer kva eining som vert ramma av personellnedgang? Risikerer ein ei total utarming av einingar som allereie er skrapa på ressursar? Dette er bekymringar som politikarane bør svara ut før budsjettvedtaket.

For all del, me har den største respekt for politikarane som har den vanskelege oppgåva med å fordele byrder og goder i samfunnet, men når ein til dømes vel å prioritere ei hengebru i Straumen til over 20 millionar, framfor å satsa på tenestetilbodet til innbyggarane, så vil me med all respekt, melda at dette er ei uklok avgjerd.

Utdanningsforbundet Ullensvang ser sjølvsagt utfordringane til kommunen. Med ein stram kommuneøkonomi må me alle vera med på kutt og tenestetilpassing. Synkande elevtal, utfordringar med å skaffa kvalifisert personell og auka utfordringar i klasserommet gjer at ein må staka ut ein langsiktig kurs for oppvekstsektoren. Den jobben er ikkje gjort i ei handvending, og slettes ikkje ved å saldera eit budsjettforslag ved å kutta 16 stillingar i oppvekst.

Så vår bøn, kjære politikarar: Få eit eigarforhold til sektoren, og tenk over kva kvalitet de vil gje born og unge i Ullensvang.

Lukke til med budsjettarbeidet!