Herold

Kystverket held fram arbeidet med å fullføre entreprenørkonkurransen for Stad skipstunnel, sjølv om regjeringa har foreslått å skrinleggje prosjektet i revidert nasjonalbudsjett.

Skips­tunnelen vart teken ut av budsjettforslaget berre to veker før planlagt kunngjering av entreprenør.

– Det er viktig å understreke at dette er eit forslag til revidert nasjonalbudsjett levert av ei mindretalsregjering, seier Harald Johnsen, prosjektleiar for Stad skipstunnel i Kystverket til Teknisk Ukeblad (TU).

Tre aktørar er att i konkurransen: AF Gruppen, franske Eiffage Genie Civil og Skanska i samarbeid med Vassbakk og Stol. Fristen er 31. august. Etter denne datoen fell tilboda bort dersom fristen ikkje blir forlengd.

Kystverket seier dei er klare til å peike ut ein vinnar rundt månadsskiftet mai/juni, men signala er at det ikkje nødvendigvis blir ei offentleg kunngjering dersom prosjektet ikkje får nye økonomiske rammer.

– Eg vil seie at det er god skikk og bruk å gi ei tilbakemelding til dei om korleis dette har gått. Men det er ikkje sikkert at vi kjem til å kunngjere vinnaren overfor omverda dersom prosjektet ikkje får vedteke auka rammer og kontrakt kan inngåast, seier Johnsen til TU.

Johnsen understrekar at departementet kan instruere Kystverket om å stanse prosessen. Likevel jobbar etaten vidare med sluttevaluering av tilboda.

Samtidig er det venta at budsjettforhandlingane først kan vere avklarte i juni. Kystverket peikar på at kontrakt uansett ikkje kan signerast utan at Stortinget eventuelt gir prosjektet auka økonomiske rammer.

Stortinget vedtok bygging av Stad skipstunnel i 2021, med ei forventning om at kostnaden ikkje burde passere 5 milliardar kroner. Det nyaste anslaget frå Kystverket er no 8,6 milliardar.

(©NPK)