Herold

Den kjende «stemme-trollmannen» Dag Nergaard er i all hast henta ned til Wien for å unngå at Jonas Lovv mistar stemma.

Dette er saka

• Jonas Lovv frå Bergen representerer Noreg i Eurovision Song Contest i Wien.
• Han har slite med stemmen på grunn av stram muskulatur før semifinalen.
• NRK har flydd inn akupunktør Dag Nergård for intensiv behandling.
• Jonas skal ha juryprøve onsdag kveld, semifinale torsdag og vonleg finale laurdag

Den norske Eurovision-draumen hang i ein tynn tråd då stemma til Jonas Lovv var i ferd med å svikte denne veka.

Bergensaren Jonas Lovv vann den store MGP-finalen på Lillehammer i vinter med låten «Yayaya».

No er spesialhjelp flydd inn frå Noreg for å få artisten klar til den avgjerande juryprøva onsdag kveld.

For etter fleire dagar med hardt press og krevjande øvingar, har Jonas Lovv fått store utfordringar med stemma.

For å løyse krisa har NRK og den norske delegasjonen valt å hente inn akupunktør Dag Nergård.

Han var på plass i Wien for å hjelpe Jonas Lovv måndag føremiddag.

Nergaard er i TV, musikk- og teatermiljøet kjent som ein «trollmann» når det kjem til å behandle profesjonelle stemmer.

Med akupunkturnåler skal Dag Nergaard forsøke å gjere stemma til Jonas Lovv klar for resten av veka i Wien.

Fann ikkje hjelp lokalt

Eurovision-general Mads Tørklep seier dei har prøvd å finne lokal hjelp i Austerrike, men utan hell.

Delegasjonen såg at Jonas hadde utfordringar, og dei freista å finne lokale krefter i Wien for å løyse situasjonen.

– Men det er ingen som har den same spisskompetansen som Dag er kjent for i Noreg. Difor valde me å fly han ned for å hjelpe oss i innspurten, seier Tørklep.

Dag Nergaard og Jonas Lovv har jobba saman dei siste dagane for å få skikk på stemma til Jonas.

Muskulært drama

Låten Lovv skal framføre er teknisk krevjande, med mykje belting og høge tonar. Det set store krav til muskulaturen.

– Mi rolle er først og fremst å sikre at han kjem seg gjennom dette, forklarar Dag Nergård.

Han fortel at problemet ofte ligg i musklane rundt stemmebanda.

– Om han blir for stram i muskulaturen som påverkar stemmebandet, kan det bli kritisk, seier eksperten.

Han undersøker no området frå skuldrene og opp, særleg halsmuskulaturen, for å få det så fritt som mogleg.

– Når musklane slappar av, jobbar dei med stemmebanda i staden for mot dei, slik at han når dei høge tonane, seier Nergård.

Nergård har over 20 års erfaring frå teater og TV, og seier det er mangel på slik stemmekompetanse i Europa.

Jonas Lovv på den turkise løparen under opninga av ESC sist søndag.

Alt står på spel

Sjølv om den store semifinalen er torsdag, er det onsdag kveld det meste blir avgjort.

Det er då fagjuryane skal vurdere framføringa, og deira røyster tel heile 50 prosent av det totale resultatet.

– Juryprøva er kanskje viktigare enn sjølve TV-sendinga på torsdag, fordi det er fagfolk som gjer vurderingane. Det må sitte no, seier ein spent Mads Tørklep.

Trass i stemmeproblema, er optimismen framleis til stades i Wien.

– Det blir nokre intense dagar, men det er ei kul låt. Jonas har litt «Queen» over seg, og dette bør halde til ein finaleplass, avsluttar Nergård.

Jonas Lovv skal inn i hektiske dagar no med juryprøver og semifinale.