Herold

Sogn er ingen utkant.

Regionen har sterke lokalsamfunn, høg verdiskaping, kompetansemiljø, internasjonalt næringsliv og eit reiseliv i verdsklasse.

Dette føreset gode og fungerande samferdselsløysingar. Når staten no endrar sentrale rammevilkår utan å ta reelle konsekvensar for distrikta på alvor, er det grunn til uro.

Både Sognaregionen og næringslivet i Indre Sogn har levert tydelege fråsegner i saka. Over 100 verksemder og arbeidsgjevarar har samla seg om ei felles uttale: flytilbodet ved Sogndal lufthamn må ikkje svekkjast.

Sogndal lufthamn, Haukåsen, er ikkje luksus. Flyplassen er ei livsnerve for Sogn. Flyruta til Oslo er avgjerande for næringsliv, offentleg sektor, utdanning og anna persontrafikk.

Ruta til Bergen er viktig for samhandling med Vestland fylkeskommune og vidare reisekoplingar.

Difor er uroa stor når endringar i FOT‑ordninga legg opp til fjerning av tidskrav som sikrar reelle dagsreiser, redusert kapasitet og høgare billettprisar.

Dette er ikkje tekniske justeringar, men strukturelle grep som får store konsekvensar.

For næringslivet betyr det høgare kostnader, meir tapt arbeidstid og svekt konkurranseevne. For offentleg sektor betyr det dyrare reiser og vanskelegare rekruttering.

Varetransport og flyfrakt er avgjerande for fleire av åre industriverksemder. Dette tilbodet vert også redusert, med fare for konkurranseevne og arbeidsplassar.

Flytilbodet vårt må koplast med buss, båt og ferje. Manglande samordning bryt reisekjeda. Sogneregionen har vedteke ein felles mobilitets‑ og samferdselsplan.

Vi set fokus på desse problemstillingane og står samla om prioriteringane.

Dette er distriktspolitikk i praksis. Reduserer vi flytilbodet, byggjer vi ned utviklingskrafta i Sogn. Det er eit politisk val.