Herold

Ein person kontakta måndag denne veka politiet, og fortalde at naboen overvaka han med eit viltkamera.

– Det er nok ein nabokonflikt som ligg bak, tenkjer eg, seier Bodil Nakkerud ved Hardanger politistasjon.

Meldar ønska ikkje å formelt melde naboen, men at politiet skulle loggføre saka. Vedkomande fekk tips om å ta kontakt med konfliktrådet.

– Det er viktig at ein berre filmar eigen eigedom når ein set opp kamera, opplyser Nakkerud.

Politiet har òg det siste døgnet fått melding om eit mindre arbeidsuhell i lofthusområdet. Ein person skal ha kutta seg i fingeren.

Det er berre gjort undersøkingar over telefon, og politiet rykte ikkje ut. Det blir heller ikkje oppretta sak frå politiet si side.

Måndag kom det vidare inn melding om «ein type køyring som vekka merksemd» ein stad i Odda. Politiet rykte ut og fann den aktuelle bilen.

– Førar opplyste at han berre hadde vore klønete, og det er ikkje mistenke om ruspåverknad, seier Nakkerud.

På strekka mellom Kløvet og Vasstun skal ein lastebil ha køyrd svært seint og kryssa sperrelinjer. Politiet rykte ikkje ut på dette, då dei var opptatt med eit anna oppdrag.

– Elles har me fått melding om noko som går att; parkering langs vegen på Øvre Kalvanes. I går var politiet ute der, og slik det ser ut har dei vore i kontakt med tre bileigarar som har fått moglegheita til å flytte bilane, seier Nakkerud.

Ho oppmodar alle bilistar om å tenkje seg om før dei parkerer, då det er viktig at naudetatane kjem seg forbi.