Herold

Andrij Jermak har fått formell status som sikta i korrupsjonssak i Ukraina.

President Volodymyr Zelenskyj sin tidlegare stabssjef Andrij Jermak har fått formell status som sikta i ei større korrupsjonsetterforsking i Ukraina.

Det opplyser det ukrainske antikorrupsjonsbyrået (NABU).

Jermak er sikta for kvitvasking av pengar, skriv avisa The Kyiv Independent.

Ukrainske medium skriv at det er snakk om kvitvasking av 460 millionar ukrainske hryvnja. Det tilsvarar i underkant av 100 millionar kroner. Pengane skal ha blitt kvitvaska ved å byggje luksuseigedommar.

På spørsmål frå ukrainske journalistar om påstanden frå NABU måndag kveld, svarte Jermak følgande:

– Eg har ikkje noko hus. Eg har berre ein leilegheit og ein bil.

Jermak trekte seg frå stillinga då saka vart rulla opp i fjor.

– Dette er ein kjend sak, så me er ikkje overraska. Rettsprosessen går framleis føre seg, så det er for tidleg å gjere vurderingar, seier Dmytro Lytvyn, kommunikasjonsrådgivar for president Zelenskyj, til avisa The New Voice of Ukraine.

Andrij Jermak var på besøk i Noreg 20. mars ifjor saman med president Zelenskyj. Jermak er tredje person frå venstre.

Zelenskyj si høgre hand

Zelenskyj og Jermak vart kjent då Zelenskyj jobba i underhaldningsbransjen.

Etter at Zelenskyj vart president, fekk Jermak først rolla som utanrikspolitisk rådgivar, før han i 2020 vart utnemnd til leiar for presidentkontoret.

Dei to vart skildra som yin og yang, der Zelenskyj la strategien og Jermak gjennomførte han.

– Eg gjekk inn i politikken saman med Volodymyr Zelenskyj – og eg vil gå ut saman med han, har Jermak tidlegare sagt til Politico.

I november 2025 avdekka NABU gjennom avlytting at fleire tenestemenn og personar tett på Zelenskyj, har kvitvaska penger. Huset til Jermak vart ransaka og han trekte seg frå stillinga si.