Herold

Vegvesenet stengjer vegen, og med det stengjer også den vanlege kvardagen i Myrkdalen. Me har full forståing for at vegen må stengjast for å gjennomføra rassikringa på ein trygg måte. Det som ikkje er akseptabelt, er at Statens vegvesen nok ein gong verken informerer eller involverer dei fastbuande i dalen.

Stenginga råkar mange, men det er oss fastbuande som vert råka hardast. På kort tid må folk leggja om heile kvardagen for å tilpassa seg opningstidene på vegen.

For mange er kvardagen allereie ein stram kabal som så vidt går opp. Når vegen blir stengd både på dag- og kveldstid, forsvinn fleksibiliteten. Folk må gå tidlegare frå jobb, avlysa arbeidsoppgåver og velja bort aktivitetar. Ikkje fordi dei vil, men fordi dei ikkje har noko val.

Opningstidene på ettermiddagen er så korte at det blir krevjande å rekka både barnehage, SFO og fritidsaktivitetar. Resultatet er stress, farlege situasjonar i trafikken og eit familieliv som blir endå meir pressa.

For born og unge betyr dette at organiserte fritidsaktivitetar i praksis kan forsvinna. Treningar og kampar må avlysast fordi logistikken ikkje lèt seg løysa. Dette handlar ikkje om bagatellar. Det handlar om aktivitet, fellesskap og inkludering. Det kan vera at det er akkurat dei to eller tre spelarane frå Myrkdalen som manglar for at laget skal kunna stilla til kamp.

Eldre og andre som skal til lege, behandling eller oppfølging, risikerer også å bli sitjande fast fordi transporten ikkje rekk fram før ny stenging. Det kan få alvorlege konsekvensar for helse og livskvalitet.

Nattestenging ville gjort det mogleg å halda oppe ein meir normal kvardag. Då kunne folk kome seg til og frå jobb, henta born og delta i aktivitetar utan å måtta planleggja heile livet rundt ein stengd veg.

Kanskje finst det grunnar til at Vegvesenet også må halda stengt på dagtid. Men då må dei som blir råka, i det minste bli involverte og få lange nok opningstider til at kvardagen kan fungera.

No vert det nye stengingar her: – Den største irritasjonen er mangel på informasjon

Vegvesenet kjem med oppdatert informasjon: Slik blir stenginga på riksveg 13

Full forvirring kring vegstenging: – Vart skikkeleg irritert