Herold

Planforslaget for nytt parkeringshus på Framplassen i Florø er no klart. Utbyggar seg for seg 150 parkeringsplassar i tre etasjar, med forsamlingshus på toppen og eit nytt, frittståande bygg med fleire bustader.

Forslaget til privat detaljreguleringsplan for Framplassen i Florø er no overlevert Kinn kommune. Horne brygge ved Anders Nødset ønsker å bygge parkeringshus, forsamlingshus og bustadhus på eigedommen.

Planforslaget vart sendt til Kinn kommune denne veka, og neste steg er då politisk handsaming og etterfølgande offentleg høyring.

Parkeringshus, forsamlingshus og bustader

150 parkeringsplassar

Parkeringshuset skal gi plass til 150 bilar i tre etasjar.

– Dette vil redusere presset på gateparkeringa i nærområdet, gi eit meir strukturert parkeringstilbod for sentrum og bidra til at talet synlege bilar i gatebildet vert redusert, skriv iVest Consult i planomtalen.

Det vert i planen peika på at området er lite estetisk i dag.

– Planområdet er tydeleg prega av menneskeleg påverknad. Dagens parkeringsareal har låg landskapsmessig kvalitet og framstår som eit lite estetisk byrom. Visuelt kan dagens situasjon ved Framplassen oppfattast som eit ufullstendig unytta byrom, med manglande heilskap i overgangen mellom dei ulike nivåa, viser planen til.

Forsamlingshus og bustadhus

Oppå parkeringsanlegget er det planlagt eit nytt forsamlingshus som vil fungere som ei naturleg utviding av den eksisterande kyrkjeparken. Prosjektet inkluderer også riving av ein eldre bustad for å gi plass til eit nytt og meir effektivt leilegheitsbygg. Det vert lagt stor vekt på estetisk utforming, bevaring av kulturmiljøet og forbetring av stiar og gangvegar for mjuke trafikantar i området.

Området er omfatta av omsynssone for kulturmiljø, og skal ha ei parkmessig opparbeiding med høg standard, står det i planen. Det skal leggast stor vekt på den estetiske utforminga og nærleiken til kyrkja.

Krigsminne under kyrkjeparken

I fjellet ved Framplassen ligg det eit eldre tilfluktsrom frå 2. verdskrig, sprengt inn under kyrkjeparken. Det er usikkert kor stort anlegget, og i kva stand det er, då det ikkje har vore tilgjengeleg på over 60 år.

– Det finst heller inga skriftleg informasjon om omfanget og tilstanden på bunkeren, men dersom delar av bunkeren kan bevarast og sikrast tilstrekkeleg, vil det vere mogleg å etablere tilkomst til anlegget i nytt parkeringshus, skriv dei i planen.

Utbyggar skal ha dialog med Florø krigshistorielag i prosessen.

– Krigshistorielaget skal få tilgang til anlegget og dokumentere minnet for ettertida, slik dei har bede om i sin merknad til planarbeidet.

Desse forsvinn når det kjem parkeringshus på Framplassen

Vårløysing og ras opna tilfluktsrommet under kyrkjeparken