Herold

Ein dramaserie og ein realityserie stakk av med flest prisar då TV-bransjen feira seg sjølv under Gullruten i Bergen i kveld. Ein ikkje ukjend kokk vann heidersprisen.

Ikkje uventa fekk NRK – serien «Team Pølsa» fleire prisar under fredagens Gullruten-utdeling i Bergen.

PUBLIKUMSPRIS: Benjamin Midtbø Høydal frå Gulen i Vestland var med i årets sesong av «Team Pølsa»

Den svært populære serien vann publikumsprisen, og prisen for beste reality – og livsstilsprogram. I tillegg vann Erik Tomter prisen for årets deltakar.

ÅRETS DELTAKAR: Erik Tomter har sjarmert mange i «Team Pølsa».

Sjå alle vinnarane her:

Ein annan NRK – serie som vann tre prisar var «Ølhunden Berit».

Anders Baasmo vann for beste skodespelar, og Jonas Strand Gravli for beste skodespelar i ei birolle. Serien vann også prisen for beste dramaserie.

– Eg trur denne serien er svært viktig. Me lever isolerte liv, der me kan få det me vil på døra, utan å møta eit einaste menneskje. Nettroll har ikkje blitt mindre aktuelt – dei har til og med flytta inn i Det kvite huset, seier Baasmo til NRK.

PRISVINNAR: Anders Baasmo på veg opp på scena for å motta pris.

NRK vann flest prisar

I alt 13 av dei 20 prisane gjekk til program som har gått på NRK. TV 2 fekk tre prisar, TVNorge/HBO Max to prisar, og VGTV ein pris.

LITE DRAMA: Skodespelarane i «Psykodrama» jublar for prisen for beste humordrama.

Den tjuande og siste prisen var heidersprisen, som gjekk til kjendiskokk Eyvind Hellstrøm.

LANG KARRIERE: Eyvind Hellstrøm fekk heidersprisen på Gullruten. Her er han eit par år yngre, saman med Ingrid Espelid Hovig.

Det var kulturminister Lubna Jaffery som delte ut prisen. I grunngjevinga sa Hellstrøm brenn så sterkt for faget sitt at det er umogleg å ikkje la seg engasjera.

– Han har påverka heile det norske folks forhold til mat. Han har gjeve mat, som kunst og som eit symbol på fellesskap, ein status i Noreg som han kan vera stolt av, sa Jaffery.

LIDENSKAP: Det har Eyvind Hellstrøm fullt av, ifølgje prisutdelar Lubna Jaffery.

Til pressa sa Hellstrøm etter tildelinga at det var utruleg kjekt.

– Eg har halde på med TV ganske lenge, så det er fantastisk. Eg tenkjer at mat, humor, kjærleik og venskap er det som gjer oss til gode menneske, sa Hellstrøm.

– Siktar mot Trump

NRKs korrespondent Yama Wolasmal vann pris som beste programleiar for fakta og aktualitet. I programmet «Yama utfordrar» intervjuar han kjende menneske i internasjonal storpolitikk.

Og slikt kan vera nervepirrande, også for ein garva journalist.

– Eg er alltid nervøs og har høg puls før slike intervju, men det gjer meg også skjerpa. Når kameraet blir slått på kjem roa over meg, og eg klarer å konsentrera meg, seier Wolasmal.

SIKTAR HØGT: Gullrutevinnar Yama Wolasmal har eit mål om å intervjua USAs president Donald Trump.

Og han har eit klårt mål om kven han helst vil intervjua.

– Me siktar høgt. Me siktar mot Trump. Kvifor ikkje? Det er lov å drøyma, seier han.