Herold

81 år har gåttsidan krigen var over, men vi skal aldri gløyme kva som stod på spel, ei heller dei som kjempa for vår fridom. 8. mai skal vi minnast dei som gav alt i kampen for eit fritt Norge under andre verdskrig.

I år skal 330 skvadron Florø legge ned ein krans til minne om ein av våre eigne.

Florøværing og kvartermester Odd Batalden var telegrafist og skyttar i 330 skvadron under andre verdskrig, då dei hadde base på Island. Oppdraget var å gjere seglasen for allierte skip tryggast mogleg. Dei skulle vakte over konvoiar på veg over havet med viktig last om bord for å vinne krigen. Målet var å stanse tyske ubåtar eller fly frå å angripe allierte skip. Mottoet var «Trygg havet».

Dette vareit oppdrag som var farleg av fleire grunnar. Fienden ville dei det verste, vêret var skiftande, og dåtidas teknologi var ikkje utan feil.

På ein flytur ein sommardag i 1941 gjekk det gale. Eit norsk Northrop-fly med tre personar om bord kom aldri tilbake til basen. Tre norske liv gjekk tapt.

30. juli er det 85 år sidan kvartermester Odd Batalden mista livet i teneste for 330 skvadron og kongeriket Norge.

Batalden var fødd i Florø 1. august 1911. Han var son av Kristine Andrea og Olaus Batalden, han vaks opp på Store Batalden saman med to brør og to søstrer.

I 1934 tok han rekruttskulen etter først å ha fullført handelsgymnaset. Han jobba mellom anna som sjømann, men tok etter kvart Marinens signalskole, og utdanna seg som telegrafist i Marinens Flygevåpen.

I 1939 deltok han i nøytralitetsvakta. Då krigen kom i april 1940 reiste han frå Bergen, via Nord-Norge, til Shetland. I august kom han til leiren kalla «Little Norway» i Toronto i Canada, for å starte opptreninga til krigsteneste.

I april 1941reiste han til Island som telegrafist og skyttar på dei norske flya som var stasjonert der. Tre månadar seinare mista han livet.

Kvartermester Odd Batalden er eit eksempel til etterfølging. Han var ein som tok eit val, ein som ville beskytte fridommen og ein som ville gjere sitt, sjølv om det var med fare for eige liv.

Krig er sjeldanei god løysing, men når den kjem nært nok på, vil du gjere det du kan for å stoppe den. Odd Batalden gjorde sin innsats, og vi er stolte av å vere i same avdeling som han.

Mottoet til 330 skvadron er framleis «Trygg havet». I ei tid der verda er i endring, skal vi ta med oss motet våre kollegaer hadde under oppdraga sine på Island under andre verdskrig.

Takk for det du ga, takk for det du ofra. Til minne om kvartermester Odd Batalden.