Herold

Sist Brann var i cupfinalen drakk supporterane i Oslo opp alt Hansa-ølet. I år har butikkane teke grep.

Saka oppsummert:

• Brann-supporterar har tidlegare drukke opp alt Hansa-ølet i Oslo under cupfinalen.
• Butikkar i Oslo, særleg på Voldsløkka, har tinga ekstra Hansa-øl for å møte etterspurnaden.
• Cupfinalen og Holmenkollstafetten skjer same dag, og det er venta ei stor folkemengd.
• Diaspora Bergensis har varsla butikkar om den høge etterspurnaden etter øl.
• Ruter og politiet er førebudde på den store tilstrøyminga av menneske.
• Brann-supporterar blir oppmoda til å samlast på Voldsløkka og marsjere til Ullevaal.

Det blir reine folkefesten i hovudstaden på laurdag, når Holmenkollstafetten og cupfinalen i herrefotball skjer same dag.

Ei gruppe har lagt inn ei konkret bestilling for dagen:

– Eg vart kontakta av nokre bergensarar, som tipsa meg om å kjøpe inn ekstra øl til helga.

Det seier kjøpmann Kent Bratlien Windahl på Rema 1000 Bjølsen.

Daglegvarebutikken hans ligg passande nok i Bergensgaten på Voldsløkka, som er området der Brann-supporterane samlast før cupfinalen.

– Vi har bestilt inn seks-sju pallar ekstra med Hansa-øl. Vi har jo ikkje kjøleskapskapasitet til alt, men vi får etterfylle fortløpande, seier Windahl.

Nabobutikken Kiwi Bjølsen er også klare for cupfinale, ifølgje Bergensavisen.

Tar lærdom etter cupfinalen 2023

Brann-supporterane og daglegvarebutikkane i Oslo kan nemleg fortelje om vonde minne frå cupfinalen i 2023.

Brann-supporterane samla seg på St. Hanshaugen før Brann skulle møte Lillestrøm på Ullevaal.

Men butikkane rundt gjekk både tomt for øl, og var til dels underbemanna, opplyser supporterleiar Erlend Ytre-Arne Vågane i Bataljonen.

– Så vi tek litt læring frå det, og tenkte at her er det lurt å gi beskjed slik at dei kan førebu seg best mogleg. Både for deira del og kundane sin del.

Styreleiar i Diaspora Bergensis var på St. Hanshaugen då butikkane gjekk tome for øl i 2023. Det skjer truleg ikkje i år.

Diaspora Bergensis, grupperinga for bergensarar i eksil i Oslo, fekk difor i oppgåve å legge inn ei bestilling.

Styreleiar Khorsid Rafei Tari har difor varsla dei tre matbutikkane på Voldsløkka om at øl-etterspurnaden vil bli høg denne dagen.

– Ja, det var klar beskjed. Vi måtte også gjerne ta ut alt det andre ølet og rydde plass til Hansa i kjøleskapet, seier kjøpmann Windahl.

Minst 8.500 Brann-supportarar tek turen til Oslo for cupfinalen. Her frå cupfinalen i 2023.

Folkefest i hovudstaden

I tillegg til at 26.000 tilskodarar skal på cupfinale på Ullevaal, skal 80.000 menneske springe Holmenkollstafetten i Oslo tidlegare på dagen.

Både politiet og kollektivselskapet Ruter seier dei er godt budde for helga.

Årets Holmenkollstafett har nådd ny rekord med 80.000 løpeklare deltakarar,

Pressevakt Øyvind Nordli i Ruter oppmodar dei som skal på cupfinale om å reise frå sentrum med linje 5 Ringen austover via Tøyen.

– Det blir folkefest og kjem til å vere masse folk i heile byen. Men så lenge folk er tolmodige og bereknar litt ekstra tid, så går nok det her veldig bra, seier Nordli.

Heiar på Brann – denne helga

Både supporterleiaren for Bataljonen og styreleiar for Diaspora Bergensis er klare for helga.

– Eg skal kose meg på Voldsløkka med mange andre bergensarar og Brann-supportarar frå klokka 12, seier eksil-bergensar Tari.

– Eg trur det blir ei sensasjonell helg. Vi oppmodar alle om å møte opp på Voldsløkka og stille opp i marsjen til Ullevaal. Så er det aller viktigaste at alle syng så høgt dei berre kan, seier Bataljonen-leiar Vågane.

FREMAD MARSJ: Brann-supportarar på veg til Ullevaal stadion før cupfinalen i 2023.

Og trass i at kjøpmann Windahl er Vålerenga-supporter, så har han teke oppmodinga frå bergensarane på alvor.

– Eg gav beskjed om at vi skal gjere eit unntak denne helga, og fylle på litt ekstra med Hansa. Så vi heiar på Brann – akkurat den helga her.

Og er du Bodø/Glimt-supporter og har lest saka heilt ned hit: I saka under får du informasjon om kor det skjer for dei gule og svarte på laurdag.