Herold

Frå starten av mai og fram til 28. august blir det auka tungtrafikk på Dale. Det kan verta opp mot 100 lastebilpasseringar kvar dag som skal flytta massar for å førebu anleggsarbeidet på Fellesprosjektet Arna–Stanghelle.

Arbeidet omfattar transport av massar frå Dalehagen (Johagen) og Brualeitet til Geitabakken. Transporten skjer i samband med førebuing av riggplassar for fellesprosjektet Arna–Stanghelle. Det blir ikkje køyra massar i vekene 28, 29 og 30.

Køyrer fire dagar i veka

Lastebilane skal køyra måndag til torsdag mellom klokka 07.00 og 19.00. I travle periodar vil det vera opp mot 100 lastebilpasseringar kvar dag. Ruta går frå Dalehagen gjennom Dale sentrum, Sandlivegen og over brua ved Turbinen.

Kommunikasjonsleiar i Bane NOR, Ingvild Eikeland, seier at starten er litt forseinka.

- Oppstarten av lastebiltransporten er noko forskuva, men vil truleg starta i løpet av dei neste to vekene. Talet på lastebilar vil variera gjennom anleggsperioden. I tillegg vil me tilpassa transporten i dei travlaste tidene med gangtrafikk for skuleelevane om morgonen og på ettermiddagstid, fortel ho.

Gjer klart for brakker og utstyr

Området ved Brualeitet på Vaksdal skal brukast til brakkerigg og utstyr for entreprenøren. Dalehagen skal seinare brukast til å lagra massar frå dei nye tunnelane i prosjektet.

- Det er matjord som skal flyttast frå dei to områda. Dette er for å ta vare på matjorda, seier nabokontakt for Fellesprosjektet Arna-Stanghelle, Askild Stordal.

Mesteparten av matjorda, om lag 7350 kubikkmeter, kjem frå Dalehagen.

Fokus på tryggleik langs vegen

Tungtrafikken går i område der mange ferdast til fots. Deler av strekninga fungerer som skuleveg for barna på staden. Statens vegvesen oppmodar alle om å følgja skiltinga og visa ekstra varsemd i trafikken.

- Byggjeprosjektet vil i samarbeid med skulen arrangera ein dag med fokus på trafikktryggleik, der entreprenøren stiller med lastebil, seier Eikeland.

Målet er at elevane skal få læra om korleis dei skal ferdast trygt rundt store køyretøy.