Herold

Sidan måndag har det vore store utfordringar med vassforsyninga i delar av vaksdalsbygda.

Torsdag opplyser Vaksdal kommune at leitinga etter lekkasjen på vassleidningsnett på Vaksdal, held fram. Det var måndag at kommunen melde om problem med vassforsyninga i Botnavegen, Brualeitet og Krekane. Det har sidan vore jobba både på dag- og nattetid for å lokalisera vasslekkasjen.

Håpar det nærmar seg

Torsdag morgon håpar ein at det nærmar seg ei løysing.

- Det er leigd inn endå fleire eksterne ressursar for å hjelpa. Arbeidet onsdag kveld betra situasjonen, og vasstrykket vil bli betre i løpet av torsdag for dei husstandane som framleis har vassforsyning. Har ein vore heilt utan vatn, må ein spyla vatnet på det lågaste punktet i huset til det er klart når det kjem tilbake. Har ein berre hatt dårleg trykk, treng ein ikkje å gjera dette, opplyser kommunen.

Kan henta vatn

For dei husstandane som ikkje har vatn, er samfunnssalen framleis open.

- Der er det tilgang til dusjar og garderobar. Vassposar er tilgjengelege, og folk kan tappa vatn frå hydranten på plenen ved Vaksdal Senter. Kokevarsel gjeld framleis for Botnavegen, Brualeitet og Krekane, melder kommunen.

Framleis problem med vatnet på Vaksdal

Kommunen har sendt ut kokevarsel