Herold

Då det kom inn vatn på pauserommet til Bravida på Brualeitet, vart det klart kor vassleidningslekkasjen på Vaksdal var. Kommunen sine folk har søkt etter lekkasjen i over tre døgn.

Arnkjell Jordalen i Vaksdal kommune er letta over at ein endeleg har lokalisert vassleidningsbrotet som har gjort at folk i Botnavegen, Brualeitet og Krekane har vore utan vatn, eller hatt dårleg trykk.

- Ja, då eg klokka 07 i dag tidleg fekk telefon om at det kom vatn inn hjå Bravida, så vart eg faktisk glad. Sjølv om det sjølvsagt ikkje er bra når det kjem vatn inn i eit bygg, så visste me då at vassleidningsbrotet var lokalisert. Me hadde før dette køyrt på ekstra vasstrykk, og det gav endeleg resultat, seier Jordalen.

Vil ta litt tid

Ein går no i gang med arbeidet for å gje dei som manglar vatn i springane normal vasstilførsle. Men Jordalen seier at dette dessverre vil ta litt tid.

- Ja, sidan dette er under eit bygg, så må me i første omgang grava opp på begge sider av bygget og leggja ein mellombels vassleidning rundt, før vatnet kan koplast på igjen. Dette tek noko tid, og ein treng delar for å kopla det heile saman. Så eg håpar og trur at i løpet av det neste døgnet skal vatnet vera tilbake, men det kan også dukka opp uføresette ting som forseinkar det heile, seier Jordalen.

Forstår frustrasjon

Han har stor forståing for at folk som ikkje har hatt vatn i springen i fleire dagar, har vore utolmodige.

- Ja, sjølvsagt forstår eg at folk har vore både utolmodige og fortvila. Me har fått svær mange telefonar, og folk har etterlyst meir informasjon. Me har prøvt å informera så godt me kan, men det er også slik at me rett og slett ikkje har hatt så mykje informasjon å dela ut over at me har leita etter brotet og at det har vore mogleg å henta vatn og dusja i samfunnssalen, seier Jordalen.

Strie døgn

Han vedgår at det har vore ekstraordinære dagar sidan søndag ved midnatt då det heile starta.

- Mannskapa våre har stått på både dag og natt, men innimellom har me måtta senda dei heim for å sova. Me har også henta inn private aktørar som kommunen har rammeavtale med for å finna ut av dette. No ser me enden på saka, og det er eg veldig glad for, seier Jordalen.

Då VP snakka med han like etter klokka 11 torsdag, var det telefonsamtale nummer 50 han hadde den dagen.

Gamle røyr som ligg djupt

- Kvifor er det så vanskeleg å finna slike vassleidningsbrot?

- Det har mellom anna å gjera med at det er gamle vassleidningar som gjerne ligg djupt. Enkelte stader, som rundt E16-krysset, ligg røyra 6-7 meter nede i bakken. På Brualeitet ligg det også to parallelle vassleidningar, og biltrafikk og støy gjer det utfordrande å lytta. Det er også lange strekk mellom kummene i området, noko som gjer det ekstra utfordrande, seier Jordalen.

Lekkasjen vart altså funnen under Bravida-bygget på Brualeitet.

- Me må også få sjekka at det ikkje ligg høgspentkablar i området me skal grava i, og så skal jobben gjerast. Så det vil dessverre ta litt tid dette. Men no har me altså lokalisert vassleidningsbrotet, slik at me endeleg ser enden på det heile, seier Arnkjell Jordalen.

Framleis problem med vatnet på Vaksdal

Kommunen har sendt ut kokevarsel

- Har leigd inn fleire eksterne ressursar