Herold

Onsdag 6. mai skriv redaktør Kai Aage Pedersen om flytilbodet og den gamle dragkampen mellom aust og vest. Her er det mykje eg kan skrive under på, men på eit punkt bommar redaktøren.

Dersom redaktøren trur underteikna og det lokale Arbeidarpartiet har vore for tamme eller politisk korrekte til å seie kva vi meiner, så er det berre å skru på radioen, lese Firda og følge debatten.

På tide at Arbeidarpartiet legg vekk arrogansen!

Om nokon kom i fyr og flamme etter anbodet på FOT-rutene, så var det våre lokallag i Arbeidarpartiet og underteikna som folkevald for regionen vår. Vi meiner dette er feil. Det er vi tydelege på, og vi er langt frå ferdig.

For oss handlar ikkje dette om partifargar. Men om eit grunnleggjande prinsipp om at landsdelen vår skal ha den nødvendige infrastrukturen til både familiar og næringsliv.

Det er nok av dei som berre spretter opp i gladsaker og skuggar bana når ting blir vanskeleg eller ein er ueinig med sitt eige parti.

Eg trur det er meir tillitvekkande å vere ufiltrert og ærleg om begge deler. Når vi har makt, må vi og ta ansvar.

Sidan 2021 har det blitt rimelegare å få barn, studere og reise i Sogn og Fjordane. Det har ikkje skjedd som ein solosiger, men lagarbeid.

Som redaktøren var inne på vart det ordentleg krise for oss når vi fekk framlegget til årets statsbudsjett. Gratisferjer og sletting av studiegjeld låg for hogg. Den kampen tok vi internt i Arbeiderpartiet. Eg, og mange av dei lokale folka våre, var krystallklare på at det var vi sjølv som måtte rydde opp.

Når røyken la seg etter to veker med kamp med makta, vart begge sakene gjennomført av Arbeiderpartiet. Uansett kva parti ein måtte føle seg heime i, er sletting av studiegjeld ein av dei viktigaste distriktsgrepa i Noreg på 40 år.

Det er langt frå sikkert at vi vinn denne kampen om FOT-rutene.

Men éin ting kan eg uansett garantere redaktøren: Når det kjem til saker som er viktige for regionen vår, så seier vi det vi meiner.