Herold

To innslag frå Kvinnherad spelte seg vidare til landsfinalen i UKM.

Tysdag kveld fekk ensemblet «Honk Horns» og trommeslagar Artur Zimin beskjeden om at dei hadde sikra seg ein plass i den nasjonale UKM-festivalen i Trondheim i juni.

«Vi gratulerer dei flinke musikarane våre og ønsker dei masse lukke til i Trondheim. Vi er stolte av dykk», skriv Kvinnherad kulturskule på Facebook.

Rektor Kirill Zimin fortel til Kvinnheringen tysdag kveld at dei har all grunn til å vera stolte.

– Begge innslaga leverte fantastisk i fylkesfinalen i Førde. At vi har to innslag vidare til den store landsfinalen er ganske sjeldan. Det er både fantastisk og heilt utruleg, seier han.

Ensemblet Honk Horns består av Artur Zimin, Ola Hermann-Fossli, Anna Hermann-Fossli, Avrora Zimina, Sigrid Lunestad Opland og Theodor John Børretzen. Dei framførte komposisjonen «Joker i Trafikk».

Medan Artur Zimin, som spelte under artistnamnet Spacedrummer, framførte komposisjonen «Romodyssé».

Landsfinalen i UKM går av stabelen i Trondheim 20. til 24. juni.