– Når desse båtane er ferdige, har vi vist kva norsk verftsindustri kan få til i verdstoppen
Plus
Kvinnherad-selskapet Herde Kompositt er i gang med bygginga av «verdas mest effektive batteridrivne passasjerbåtar».
Det skriv Brim Explorer i ei pressemelding 4. mai. Brim Explorer er eit reiselivs- og teknologiselskap som sidan oppstarten i 2018 har utvikla og bygd fem elektriske og hybridelektriske båtar til turisme.
No er bygginga av dei neste – to heilelektriske høghastigheitstrimaranar – i gang, og det skjer ved Herde Kompositt på Årsnes i Kvinnherad.
Båtane, som skal brukast til sightseeing-, kvalsafari- og middagsturar på norskekysten vil, ifølge Brim Explorer, vera verdas mest effektive batteridrivne passasjerbåtar når dei står klare våren 2027.
«Det er noko heilt spesielt å sjå ein båt ta form på verftet. Særleg når det er noko så banebrytande som dette. Det vi gjer her er heilt unikt», seier teknologisjef og gründer Espen Larsen-Hakkebo i Brim Explorer i pressemeldinga.
– Vekt er alt
Skroga, som er det Herde Kompositt skal levera, skal bli bygde i kompositt for å halda vekta nede, noko som er ein føresetnad for at båtane «skal klara noko ingen batteridrivne passasjerbåtar har klart tidlegare». Med det peikar selskapet på målet om å kunna segla 100 nautiske mil i 20 knops fart utan å lada.
«Vekt er alt når du skal kombinera nullutslepp, høg fart og lang rekkevidde. Kvar einaste kilo vi sparar i skroget, gir oss lengre rekkevidde med batteri. Det er derfor kompositt er riktig val, og det er derfor vi har valt å bygga hos Herde Kompositt her i Noreg», seier Larsen-Hakkebo.
– Krevjande
Audun Andreas Dahl, dagleg leiar i Herde Kompositt, skildrar arbeidet som krevjande.
«Vi er godt i gang, og produksjonen går etter plan. Det er eit krevjande prosjekt med ekstreme krav til både materialar og presisjon, men vi har teamet og kompetansen til å levera. Når desse båtane er ferdige, har vi vist kva norsk verftsindustri kan få til i verdstoppen», seier Dahl i pressemeldinga.
Når skroga er ferdige bygde på Årsnes, vil dei bli frakta vidare til Horten Skipsreparasjoner for systemintegrasjon og interiørarbeid.
«Den samla investeringa er i storleiksorden 200 millionar kroner og er den største nokosinne for Brim Explorer. Prosjektet har fått 40 millionar kroner i støtte frå Enova og vil sysselsetta om lag 50 personar i Hardanger og Horten», står det i pressemeldinga.