Herold

Banken treng meir pengar – fort.

Styret i Sparebank 1 Sogn og Fjordane vil hente inn rundt 400 millionar kroner i ny eigenkapital frå eigarane Sparebankstiftinga Sogn og Fjordane og Sparebankstiftinga Fjaler.

Bakgrunnen er at banken har avdekt feil i korleis kapitaldekninga har vore rapportert, kjem det fram i ei børsmelding publisert måndag ettermiddag.

Vedtatt måndag

Emisjonen betyr at banken lagar nye eigenkapitalbevis – ein slags «aksje» i sparebanken – som stiftingane kjøper mot å skyte inn friske pengar.

Det blir foreslått å skrive ut 1.380.643 nye eigenkapitalbevis, med ein teikningskurs på 289,72 kroner per stykk. Dersom generalforsamlinga seier ja 18. mai, vil banken få inn om lag 400 millionar kroner.

Dette er ein såkalla retta emisjon. Berre dei to sparebankstiftingane, som eig det aller meste av banken, får vere med.

Styra i dei to stiftingane vedtok måndag å delta i emisjonen i tråd med dagens eigardelar. Hovudeigarane går altså inn med meir pengar for å styrke banken sin kapital og sikre at han har rom til å vekse vidare.

Må ha ja frå Finanstilsynet

Emisjonen er ikkje endeleg avgjort. For å bli gjennomført må to ting på plass:

• Generalforsamlinga i banken må vedta forslaget på eit ekstraordinært møte 18. mai.
• Finanstilsynet må gi løyve til kapitalutvidinga.

Planen er at alt er gjennomført innan utgangen av juni 2026, dersom alle godkjenningar kjem på plass.

Feilen i kapitaldekninga og nivået på kapitalen skal bli nærare forklart i kvartalsrapporten for 1. kvartal 2026, som blir offentleggjort 12. mai, skriv dei.

Firda kjem tilbake med meir.