Herold

Skadestaden er no rydda og vegen er open for fri ferdsel.

Vegtrafikksentralen Vest melde klokka 11.22 måndag føremiddag om eit trafikkuhell i Stad.

Uhellet skal ha skjedd ved Lefdal på rv. 15 mellom Nordfjordeid og Måløy, og eitt felt var stengt som følger av uhellet.

Det var i starten ikkje opplyst kva trafikkuhell det var snakk om, men Operasjonssentralen i Vest politidistrikt melde seinare at det var ein varebil som hadde køyrt inn i eit autovern.

Naudetatane rykte ut til staden. Det skal ikkje vere personskadar som følge av uhellet. Det blei elles opplyst å ikkje vere store trafikale utfordringar på staden.

SISTE:Klokka 12:08 var bilbergar framme på staden. Det skal vere ein del skadar på autovernet, og entreprenør er varsla.

– Det er mistanke om at førar kan ha sovna bak rattet. Han blir teken med til legevakt for blodprøvetaking. Det er teke beslag i førarkortet, opplyser Morten Rebnord, operasjonsleiar i Vest politidistrikt.

Like etter melde politiet at skadestaden er rydda og vegen er open for fri ferdsel.