Herold

Viksdalen er ein stad der det er trygt å vekse opp, med oversiktleg miljø, god barnehage og skule. Dette vil vi ta vare på og utvikle vidare.

I Firda sin presentasjon av sak i Utval for oppvekst og kultur i Sunnfjord kommune 22.04.25, var det ein tittel og eit bilde av Viksdalen skule som eg reagerte sterkt på. Det var slik: Bygda har nesten ikkje barn. No slit dei med bemanning og. Illustrasjonen var bilde av Viksdalen skule med 2 born på ein elles tom skuleplass. Dette framstiller Viksdalen i eit lite godt lys. Heldigvis er tittelen og bildet i skrivande stund teke bort frå nettsida, eg vel likevel å nytte høvet til å framsnakke Viksdalen som ein god stad å vekse opp.

I kunnskapsgrunnlaget Sunnfjord kommune har fått utarbeidd, står følgande i skuleportrett av Viksdalen skule: «Viksdalen skule står fram som ein skule med høgt kvalifisert og stabilt personale som tilbyr variert og innovativ undervisning.»

Vidare står det:«Då skulen er relativt liten, har dei tilsette god kjennskap til kvar enkelt elev og legg tiltrette undervisninga for å møte deira behov. Små elevgrupper bidrar til individuell oppfølging og integrering av elevar med særlege behov. Skulen nyt godt av lokale ressursar og eit nært samarbeid med lokalsamfunnet, noko som har positiv betydning for læringsmiljøet.»

Dette er godt å lese, og å vite at dette står i eit kommunalt dokument, ikkje skrive av ein med personlege interesser i dette. Vi ser at det er langt frå problem med bemanninga til skulen. Personalet er velutdanna og stabilt. Det er også eit særtrekk ved små bygdelag at sidan der ikkje er så mange, får ungane med seg unik verdifull samhandling mellom årskull/ generasjonar, det har sin eigen verdi.

I saksutgreiinga til kommunen i sak om samlokalisering av Viksdalen skule og barnehage til nytt oppveksttun, vert det problematisert at barnehagen er liten og at det kan bli vanskar med rekruttering. Rekrutteringsvanskar til barnehage er nok ikkje berre i Viksdalen. På NRK si morgonsending 23.04.26, vert det presentert ei sak om rekrutteringsvanskar i barnehagane. Dette er faktisk eit problem på landsbasis. I sendinga vert trekt inn som døme eit besøk til Vieåsen barnehage, der dei og slit med bemanning. Ja, vi treng som samfunn at mange fleire ser verdien i å arbeide med born.

Ungdomar frå Viksdalen hevdar seg også godt på arenaer utanfor bygda. Her kan eg nemne eit ferskt døme: Volleyballspelarar frå Viksdalen var med i Blindheimcup helga 18.–19. april. U13-laget deltok på si fyrste turnering med 6-ar lag, og vann alle sine kampar.

Elles er her eit aktivt idrettslag med aktivitetar for born og ungdom året rundt, godt skyttarlag, eit aktivt folkemusikkmiljø, 4H, for å nemne noko. Vi har eit fint pussa opp bibliotek, der det er laga plass for ungdomsklubben. Nærmiljørådet har teke initiativ til aktivitetsveke om våren etter skuleslutt, organisert og gjennomført av frivillige og foreldre. Det er eit gratis tilbod for 1.–7. klasse, gjort mogeleg ved økonomisk støtte frå ulike organisasjonar.

Sjølvsagt finst det utfordringar for borna her som andre stader, livet ville bli kjedeleg utan utfordringar. Oppsummert vil eg hevde at det er godt å vekse opp i Viksdalen. Sunnfjord kommune har som mål å ta heile kommunen i bruk. Det må vi hugse på, til beste for både bygda og kommunen.

Vil gjere Viksdalen-endring så fort som mogleg: Barnehagen slit med bemanninga