Herold

Natt til laurdag rykte politiet ut til ei privat adresse på Frekhaug, etter melding om ordensforstyrring og amper stemning.

Ein person er send til Haukeland sjukehus med moglege knivskadar, og ein annan person er pågripen.

I samband med utrykkinga stansa ein patrulje ein bil i nærleiken av den aktuelle adressa.

Føraren av bilen framstod som skadd.

– Personen har skadar som er mogleg foreinlege med bruk av kniv, opplyser operasjonsleiar Bjarte Rebnord.

Vaken og medviten

Den skadde bilføraren vart raskt køyrd til Haukeland sjukehus med ambulanse. Politiet stadfestar at vedkomande var vaken og medvitande.

Politiet kontrollerte dei andre involverte personane på adressa der bråket starta. Klokka 02.48 oppdaterte operasjonsleiaren med at ein person var pågripen på staden.

Hendinga vert no etterforska vidare.

– Politiet har per no ikkje oversikt over hendingsforløpet, men etterforskar vidare i forhold til dette. Det er oppretta sak, opplyser Rebnord.