Herold

Etter tidligare oppslag i media kan ein få inntrykk av at eigaren av Kvinnherad Breiband meiner at selskapet er lite, sårbart og med manglande kompetanse. Det er ikkje eit bilete vi som tilsette kjenner oss igjen i.

Kvinnherad Breiband har i dag ei svært høg dekning i kommunen og eit moderne fibernett der alle kundar kan få 1 Gbit/s, med moglegheit for endå høgare hastigheiter. Dette er eit nivå som ligg over gjennomsnittet i Noreg, og som vi har levert over fleire år. Samstundes har vi stabil drift med særs lite nedetid, døgnkontinuerleg beredskap og redundans (dobbelt sikring) i løysingane våre på fiber og data, noko som er avgjerande for ein trygg og robust digital infrastruktur.

Nkom sin årsrapport for 2025 viser at etterspurnaden etter internett framleis veks, og at fastnett (fiber) held fram som den viktigaste infrastrukturen i Noreg. Rapporten peikar på generelle utviklingstrekk i marknaden, men gir ikkje grunnlag for å konkludera med at mindre, velfungerande fiberaktørar med sterk lokal posisjon vil få særskilte utfordringar framover.

Selskapet har spesialisert intern kompetanse og er i liten grad avhengig av ekstern ekspertise. Dette sikrar stabil drift og god beredskap. Gjennom vakthald og døgnkontinuerleg beredskap har vi kort responstid ved kritiske feil. I tillegg er det dei siste åra investert betydeleg i oppgradering av nett og kundeutstyr, og arbeidet med vidare modernisering held fram.

Vi vil òg peika på det tette og velfungerande samarbeidet vi allereie har med Kvinnherad kommune. Kommunen nyttar i dag vårt nett til kritiske tenester, med kort responstid og tett oppfølging. Det er òg drøfta korleis ein kan nytta kvarandre sin kompetanse ved behov, noko som styrkar både beredskap, drift og ressursutnytting lokalt. I strategiplanen for Kvinnherad Breiband som vart laga i 2024 står det at eit utvida samarbeid mellom kommune og breibandselskapet kan vera interessant å utforska nærare. I lys av dette meiner vi at ein burde greia ut dette alternativet grundigare.

Ved eit eventuelt sal er det naturleg å peika på forhold som kan påverka kommunen og innbyggjarane sin digitale infrastruktur:

• Endra prismodellar og mindre lokal påverknad

• Stor sannsynlegheit for lengre responstid ved feilretting

• Mindre direkte tilgang til lokal kompetanse

• Redusert fleksibilitet i prioritering av lokale behov

Vi ser at ein del politikarar spør om kommunen er riktig eigar, her er i alle fall nokre punkt som peikar i den retninga. Ein må heller ikkje gløyma korleis det gjekk med liknande oppkjøp for nokre år sidan. Dette er forhold som bør vurderast nøye når ein ser på samla risiko og beredskap.

Vi har forståing for at eigar vurderer ulike, strategiske alternativ. Samstundes meiner vi det er viktig at desse vurderingane byggjer på eit korrekt bilete av selskapet slik det faktisk fungerer i dag. Vi meiner òg det er heilt avgjerande at framtidige endringar skapar verdi og sikrar lokale arbeidsplassar – ikkje tappar ressursar.

Vårt mål er det same som eigar sitt:

At innbyggjarane i Kvinnherad skal ha trygg, stabil og framtidsretta digital infrastruktur.