Herold

Noreg vann med over 20 mål over Tsjekkia. Ekspert reagerer på motstanden Noreg møter i VM.

– Håpar Noreg blir utfordra

Norge knuste Sverige i VM: – Noe av det verste jeg har sett

«Tøffare på våre eigne treningar»

– Dei kontrollerer dette her. Eg vil seie det er tilnærma ei treningsøkt utpå her, seier NRKs handballekspert Kenneth Gabrielsen.

Noreg spelte 37-14 mot Tsjekkia i hovudspelet i VM. Før kampen var dei norske kvinnene alt kvalifisert til ein kvartfinale.

Assistenttrenar Mats Olsson er einig i at det blei ein lett kamp mot Tsjekkia.

– Det er jo ein VM-kamp så det står poeng og prestisje på spel, men intensiteten liknar jo meir på ein treningskamp, sa Mats Olsson i pausen.

Då var målforskjellen mellom laga, ti mål.

JUBLAR: Noreg vann med over 20 mål over Tsjekkia.

Handballeksperten er usikker på korleis motstanden kjem til å vere når Noreg etter kvart skal spele ein kvartfinale.

– Eg håpar ikkje det blir slik som det har vore til no. Eg håpar at Noreg blir utfordra litt annleis, seier Gabrielsen.

Han held fram:

– Eg ser ikkje for meg at det skjer i ein kvartfinale.

Til no har Noreg spelt fleire kampar der dei har vunne med fleire mål.

Det er ikkje lengre enn eitt par dagar sidan dei vann overlegent over Sverige. Då vann Noreg 39-26.

I kampen mot Sør-Korea vann Noreg 34-19.

– Eg tenkjer at me får sprunge litt, og så synest eg me står godt i forsvar. Ein legg merke til at tsjekkarane slepp opp på gassen og går tom for krefter, seier landslagsspelar Maren Aardahl til NRK.

Ho held fram:

– Det er mykje tøffare på våre eigne treningar. Det er jo det.

– Det er nokon som likar å sjå mange mål bli skåra, og så er det nokon som likar spennande kampar. Me kan liksom ikkje gjere så mykje annleis, seier Henny Reistad, som ofte står for fleire av Noreg sine mål.

Ho er sikker på at dei kjem til å møte motstand, som vil gjere at kampane blir meir spennande.

I motsetting til Gabrielsen, ynskjer ikkje nødvendigvis landslagstrenar Ole Gustav Gjekstad så mykje spenning.

*– De vinn med over 20 mål. Det blir ikkje store spenninga? *

*– *Nei, me er glade for det, me. Me ynskjer jo ikkje noko spenning. Det er kanskje andre som gjer det, ikkje me, seier Gjekstad til NRK etter kampen.

FÅR SKRYT: Veronica Kristiansen fekk skryt for forsvarsspelet sitt

– Det nivået Noreg har vist så langt, så er det ingen som er i nærleiken. Det er forsvar og målvaktspel der det er stor forskjell frå dei andre laga, seier Gabrielsen.

Noreg vann med 23 mål. Både handballeksperten og landslagstrenaren trekkjer fram Veronica Kristiansen, som ein viktig spelar.

Kristiansen, som spelte sin landslagskamp nummer 200, var ifølgje landslagstrenar Ole Gustav Gjekstad ein viktig spelar i kampen mot Tsjekkia.

– Veronica har vel elleve brot og stole tre ballar. Ho har vore veldig bra, sa Gjekstad til Viaplay etter fyrste omgang.

– Det er gøy. Eg føler eg har fart i kroppen og god kontroll i forsvar, seier Kristiansen til NRK etter kampen.

LANDSLAGSTRENAR: Ole Gustav Gjekstad

*– Kven kan gi dykk motstand, eigentleg? *

– No trur eg det kan bli ein tøff kamp mot Brasil, utan tvil. Dei har duellsterke spelarar, så må me vere fokusert frå start, seier Kristiansen.

Siste hovudrundekamp blir spelt mot Brasil søndag. Kvartfinalen går av stabelen på tysdag.

Trass i gode resultat så langt i VM, trur landslagstrenaren at det blir tøffare motstand etter kvart.

– Me har ikkje møtt dei beste laga enda, så det blir tøffare og tøffare motstand no. Brasil blir ein test, så er det klart at det finst mange gode lag på den andre sida også. Nå får me ta Brasil og forhåpentlegvis vinne gruppa. Det er det neste målet, seier Gjekstad til NRK.

*Høyr kampen mellom Noreg og Brasil 7. desember på NRK Sport i radioappen: *

Du trenger javascript for å spille av lydklippet «Håndball - radio».