Herold

Knarvik IL ønskjer ein konstruktiv dialog og håpar kommunedirektøren og kommunestyret vurderer saka med eit blikk for både risiko og moglegheiter.

Det er vanskeleg å forstå kvifor kommunen signaliserer eit nei til ei lånegaranti som kan sikre realisering av aktivitetsparken i Knarvik.

Ordninga er velprøvd i andre kommunar, og risikoen blir ofte overvurdert.

For idrettsanlegg av denne typen er det i praksis minimal økonomisk usikkerheit. MVA blir refundert i sin heilskap, slik det alltid har vore.

Spillemidlar blir tildelte i tråd med klare kriterium, og anlegg som dette får midlar når dei søkjer korrekt og innanfor regelverket.

Kommunen vil seia nei til lånehjelp som kan sikra aktivitetsparken

Enorm støtte til prosjektet: Håpet er at parken er på plass til neste haust

Kombinasjonen av desse to ordningane reduserer reell risiko for kommunen til eit nivå som kan karakteriserast som tilnærma null.

Dette er også grunnen til at ei lånegaranti blir sett på som heilt normal praksis i ein stor del av landet.

Det er ikkje slik at Alver står overfor ein unik situasjon. I Viken har 34 kommunar etablert ei tilsvarande ordning nettopp for å sikre at idretten får utvikle viktige anlegg for barn og unge.

Utan slike verkemiddel taper ein utviklingskraft. Resultatet blir færre møteplassar, svakare folkehelse og mindre attraktivitet for kommunen som bu- og oppvekstkommune.

Samtidig høyrer vi stadig oftare – også på riksdekkande radio i dag – at norske ungdommar blir meir stillesitjande.

Knarvik er ikkje eit unntak. Ungdommane våre manglar eit lågterskel samlingspunkt.

Uorganisert aktivitet finst knapt. Den foreslåtte aktivitetsparken er ikkje ein luksus; det er ei nødvendig investering i trivsel, inkludering og framtidig folkehelse.

Alver kommune må skilje mellom løpande utgifter og langsiktige investeringar. Ei lånegaranti for eit anlegg som i stor grad finansierer seg gjennom etablerte ordningar, er nettopp ei investering – ikkje ein kostnad.

Viss kommunen vel å seie nei til dette prosjektet, sender det eit tydeleg signal om at utvikling av idretts- og nærmiljøanlegg ikkje blir prioritert.

Det vil bremse veksten vår og gjere at vi sakkar akterut samanlikna med andre kommunar som satser på liknande tiltak.

Knarvik IL ønskjer ein konstruktiv dialog og håpar kommunedirektøren og kommunestyret vurderer saka med eit blikk for både risiko og moglegheiter.

Her er moglegheitene store, risikoen liten – og gevinsten for barn, unge og nærmiljøet vårt vesentleg.