Herold

Politiet har sikra seg både videoovervaking og nye vitneobservasjonar, og trur den sakna kan ha drukna i elva.

Polsk politi har sikra seg videoovervaking frå utanfor utestaden der sakna Oliver Rivedal sist var observert 22. november, og frå eit område ved elva. Dei har også avhøyrt vitne som fortel om ein person som svømte i elva same natta.

Det kjem fram i ei pressemelding frå politiet tysdag ettermiddag.

Rivedal skal ha forlate nattklubben ZEN i Warzava klokka 04.35 22. november, og har sidan vore sakna.

– Politiet har brukt søkshundar for å lokalisere spor. Hundane har følgt eit spor til elva Wisla, opplyser kommunikasjonsrådgjevar Gry Halseth i Vest politidistrikt.

Den aktuelle laurdagen, ca. kl. 06:00, mottok politiet eit naudanrop om ein person som svømte i elva. Nokre fiskarar har opplyst at dei såg ein person både ved elvebreidda og etterpå ute i vatnet.

– Basert på videoovervaking frå staden er det stadfesta at ein mann dreiv med straumen nedover elva. Polsk politi knyter informasjonen saman og meiner det kan sjå ut som at den sakna har drukna. Polsk politi held fram søket og seier dei vil sette i verk alle moglege tiltak for å finne den sakna, avsluttar Halseth.

– Familien står i ein veldig krevjande situasjon. Dei har formidla til oss at det var ein vanskeleg beskjed å få, seier politietterforskar Oda Thorstad til Firda.

Leitar framleis etter Oliver. Politiet får lite info frå Polen