Herold

Forslaget frå fylkesdirektøren om å leggja ned studiespesialiserande ved Årdal vidaregåande skule er eit alvorleg feilgrep som kan få alvorlege konsekvensar.

Å fjerna dette heilt sentrale skuletilbodet er heilt uforsvarleg, og det vil vera ei krise for både ungdommen og lokalsamfunnet i Årdal.

Det vert peika på at berre 16 elevar hadde studiespesialiserande i Årdal som sitt førsteval ved søknadsfristen i april, men dette er ingen endeleg fasit.

Her må ein klara å sjå litt lenger fram før ein set to strekar under svaret.

Dei komande kulla frå ungdomsskulen er store, med 64 og 68 elevar. Dei to største kulla er fødde i 2011 og 2012, og skal over i vidaregåande dei neste åra.

Dersom studiespesialiserande vert fjerna, sit skulen att med skarve 27 plassar på yrkesfag for å ta unna desse elevane. Det vil i praksis tvinga nesten 100 elevar til å pendla ut av bygda. For mange betyr dette ei massiv samla reisetid på opptil fire timar kvar einaste dag.

Å senda femten- og sekstenåringar på hybel eller pendla milevis kan først og fremst vera ei sosial og emosjonell belastning. Det vil i tillegg strida mot målet om at alle skal ha like moglegheiter til utdanning, uavhengig av kor dei bur.

I tillegg gjer det noko med fritidsaktivitetar og andre sosiale aktivitetar i bygda. Heller ikkje ungdomen har meir enn 24 timar i døgeret.

Pendlarane vil bruka mykje av tida på reising, medan hybelbuarar vil ikkje lenger kunne vera aktive på til dømes fotballtrening eller korpset sine øvingskveldar.

Dette kuttet vil også ramma jentene i Årdal desidert hardast. Yrkesfaga bygda står att med, er sterkt dominerte av gutar, og Årdal risikerer dermed å mista jentene frå bygda allereie når dei er femten år gamle.

Dette er eit kraftig tilbakeslag, særleg med tanke på den strategiske satsinga regionen har hatt for å få fleire jenter inn i realfag og teknologi.

Å snevra inn tilbodet på denne måten vil i tillegg redusera valfridomen, dytta ungdom inn i studieløp dei ikkje er motiverte for, og auka risikoen for fråfall.

Forslaget om nedlegging heng heller ikkje saman med fylkeskommunen sine eigne økonomiske og strategiske vedtak. Det er nettopp investert 25 millionar kroner i å pussa opp avdelinga for studiespesialisering ved skulen.

At fylket gjev bygda 30 millionar over seks år i omstillingsmidlar for å skapa nye arbeidsplassar, samstundes som dei vil rasera kompetansegrunnlaget gjennom å byggja ned vidaregåande, er heilt uforståeleg.

Samfunnsutvikling og næringsutvikling er direkte avhengig av lokalt utdanningstilbod og ikkje minst arbeidsplassar for dei som ikkje jobbar i typiske industrifag.

Det er bra og heilt nødvendig at Sogndal vidaregåande skule får oppretta fleire klassar for å ta unna søkjartrykket der. Men Sogn er den einaste regionen i Vestland som ikkje forventar elevnedgang i åra som kjem, og regionen har samla sett ein svært pressa kapasitet.

At ein må auka kapasiteten i Sogndal, kan og skal ikkje gå på kostnad av studiespesialiserande i Årdal. Då får me også ein intern konflikt i regionen, noko ingen er tent med.

Fylkespolitikarane står no ved ein korsveg.

Å gje Årdal 30 millionar kroner i omstillingsmidlar med den eine handa, for så å rasera sjølve kompetansegrunnlaget for næringslivet med den andre, heng rett og slett ikkje på greip. Det er eit svik mot heile årdalssamfunnet.

Konklusjonen er like enkel som den er alvorleg. Auke av kapasiteten i Sogndal er heilt nødvendig, men kutt i Årdal er eit uansvarleg feilgrep.

No må politikarane visa at dei kan sjå det heile og store biletet, avvisa fylkesdirektøren si innstilling og visa at dei tek ansvar.

Å investera i ungdommen er å investera i framtida til heile samfunnet. Difor må studiespesialiserande i Årdal vernast.

Kutt vil få store konsekvensar: – Me vil mista jentene våre frå dei er femten

Kastar seg inn i debatten: – Årdølene får berre bli galne på meg

Fylkesdirektøren vil kutta klasse ved Årdal vgs

Fylkesdirektøren vil kutta klasse ved Årdal vgs