Herold

Laurdag går Bergen City Marathon av stabelen.

I år stiller 25.000 løparar til start på Bergen City Maraton. I fjor deltok om lag 50 kvinnheringar på løpet, og forventinga er at lika mange eller fleire skal delta i årets utgåve.

I fjor var Eirik Gausvik Musland frå Uskedalen best av dei lokale. Han klokka inn på tida 1:23:12 på halvmaraton og vart med dét nummer 17 i sin klasse.

I år blir det arrangert 5 forskjellige løp. Halvmaratonet skal springa ein runde rundt Bergen. Maratonet spring same løypa to gonger. Begge desse har start og målgang på Bryggen. I tillegg blir det arrangert stafett, eit løp på 5 kilometer og eit barneløp.

Og dei som skal springa kan førebua seg på rimeleg bra vêr. Ifølge Yr.no skal det koma litt regn tidleg på morgonen, men sola vil koma fram i det maratonet startar. Seinare på dagen vil det koma ein del vind. Frå klokka 12 er det meldt frisk bris frå nord med vindkast på 19 m/s.

Skal du springa, kanskje saman med kollegaer eller vener? Då blir vi glade om du deler bilde med oss, til dømes frå løpsområdet, eller i det dykk nyt eit velfortent glas med noko kaldt i etterkant!

Send bilde på e-post: redaksjonen@kvinnheringen.no.

Vi ønskjer alle kvinnheringane som skal springa lukke til!