Utøya-overlever kjem til Svelgen med si historie
Plus
Øystein Skotheim kjem på bokbad i Svelgen for å fortelje si historie. Han skal snakke om korleis han overlevde terrorangrepet på Utøya, og om romanen hans om å leve med traumane.
Bokbadet blir helde laurdag 25. april, klokka 15:00 på Bremanger Fjordhotell. Det melder Gode Bremanger på heimesida si.
Lever med traumer
Til sommaren har det gått femten år sidan Anders Behring Breivik tok livet av 77 menneske i regjeringskvartalet og på Utøya. Terrorangrepet står som det mest alvorlege på norsk jord i fredstid.
Denne hendinga har skapt eit enormt kulturelt fotavtrykk. TV-seriar, dokumentarfilmar og ei rekkje bøker har alle prøvd å gripe denne dramatiske dagen og konsekvensane av han.
Skotheim si bok kom på Oktober Forlag i fjor, og har fått fine kritikkar. VG skreiv mellom anna «vi treng denne romanen», og trilla terningen til fem.
Romanen «Kjære natt»
Øystein Skotheim var 24 år gamal då han opplevde terroren på Utøya 22. juli 2011. Han var då aktiv i AUF.
I dag er han utdanna jurist og arbeider med konflikthandtering. «Kjære natt» er hans debutroman.
Under bokbadet i Svelgen vil han dele tankar rundt boka, og korleis livet har vore etter terroren. Gjennom boka reflekterer han over korleis eit menneske kan byggje opp att livet sitt etter så djupe traume som han fekk som ung mann på Utøya.