Herold

Hardangerviddarådet støttar Eidfjord kommune sitt arbeid for å ha informasjonsarbeid på Tinnhølvegen.

– Tinnhølvegen er ein av dei største innfallsportane til Hardangervidda nasjonalpark. Grunna aukande press av besøkande, parkering i terrenget og aukande problem med villcamping vart det i 2022 valt å bruke midlar frå «Villrein som verdiskapar» for å plassere ein informasjonsmedarbeidar ved parkeringsplassen for å informere dei besøkande, og kanalisere trafikken, heiter det i eit skriv frå Eidfjord kommune.

Sidan 2022 har kommunen leigd tenester av Hardangervidda Fjelloppsyn for å ha personale stasjonert ved parkeringa på Tinnhølvegen. Dei informerer generelt om nasjonalparken, prøver å kanalisere trafikken mest mogleg, og informerer besøkande om åtferd og parkeringsreglane sett i forskrifta.

«Prosjekt Tinnhølvegen – Villrein som verdiskapar» vart avslutta i 2024, men grunna det var ein tydeleg effekt har informasjonsmedarbeidaren vorte vidareført ved hjelp av midlar frå Hardangerviddarådet, og Eidfjord kommune. Kommunen ynskjer å vidareføra tiltaket i 2026, men er avhengige av ekstern finansiering i tillegg til eige bidrag.

Fekk avslag: Miljødirektoratet tvilar på effekt av villrein-stilling

Det er estimert at det vil kosta om lag 290 209 kroner å ha personell på Tinnhølvegen frå 26. juli til 30. august, som er høgsesongen i området. På bakgrunn av dette har Eidfjord kommune bedt Hardangerviddarådet om 49 762 kroner i stønad, noko som vart tatt til orientering då rådet tidlegare i april samla seg på Hotel Ullensvang.

– Resultata syner ein reduksjon i ulovleg parkering og overnatting langs Tinnhølvegen sidan forskrifta vart innført. Det er heilt klart at informasjonsmedarbeidaren har medverka til denne positive utviklinga. Kommunen ser på det som positivt å ha fokus på informasjon og rettleiing kontra straff, heiter det i ein rapport om prosjektet.

Kampklare: – Kjøtet må heim!