Herold

Juventus-stjerna proppa kroppen full av koppar. Det kan ha motsett effekt, seier Olympiatoppen.

Den belgiske fotballspelaren Loïs Openda vekte oppsikt då han utførte ei «koppebehandling» over nesten heile kroppen.

Ei slik behandling er ikkje uvanleg blant idrettsutøvarar, men talet koppar var noko meir spesielt.

– Dette såg vilt ut ja. Eg har sett liknande bilete før, men dette var fleire koppar enn eg kan hugse å ha sett.

Det seier Harald Markussen, leiar for fysioterapiavdelinga på Olympiatoppen.

BEHANDLING: Også framsida av låra til Openda vart påført koppar.

Kopping

Kopping eller koppe-massasje er ein behandlingsmetode som involverer bruk av spesielle koppar som vert festa på huda for å skape eit vakuum.

Kopping kan ha positiv effekt gjennom smertelindring, auka blodsirkulasjon og muskelavspenning. Men også negative biverknadar som bløding, trøyttheit, svimmelheit og hovudverk som kan variere i varigheit.

Kjelde: kiropraktorgruppen.no

Han åtvarar om at det kan ha motsett effekt enn det som er føremålet.

– Hard manuell behandling av mange slag, vil sannsynlegvis og logisk sett forlenge restitusjonstida dersom ein påfører blødingar i hud og underhud som man kan sjå etterpå.

Spesialist i Belgia

Det er den belgiske helsebedrifta Akhijama som står bak bileta på Instagram. I ettertid har fleire store internasjonale medium omtalt hendinga.

Den spanske storavisa Marca skreiv blant anna: Terapien som har sjokkert fotballverda: Kva gjer Openda?

Italienske Tuttosport omtalte det slik: «Bildet er nesten forstyrrande og ser meir ut som tortur enn ein kur».

SLIT: Loïs Openda har hatt ein vanskeleg start etter overgangen til Juventus.

Det belgiske selskapet skriv på eigne heimesider at dei er spesialistar på kopping.

Selskapet har posta ei rekkje innlegg på Instagram av profesjonelle fotballspelarar som har gjennomgått behandlinga.

Blant desse finn vi blant anna Borussia Dortmund sine spelarar Serhou Guirassy og Ramy Bensebaïni.

DUO: Ramy Bensebaïni og Serhou Guirassy på Borussia Dortmund har begge gjennomført koppebehandling frå selskapet Akhijama.

Under innlegget med Juventus-stjerna Openda skriv dei:

«Takk til han for tilliten, gjestfridommen, invitasjonen til Torino og den fantastiske restauranten. Alltid ei glede å følge opp eksepsjonelle utøvarar i deira prestasjonar og restitusjon.»

NRK har prøvd å få ein kommentar frå selskapet om behandlingsmetoden, utan å få svar.

– Aldri sett så mange koppar

Fysioterapeut og massør Jedrek Ksiazkiewicz i selskapet Rygg&Rehab kjenner koppebehandlinga godt.

– Eg meiner at kopping generelt er ein effektiv metode som kan støtte kroppens restitusjon etter intensiv fysisk belastning. Bruken av koppar fører til auka blodgjennomstrøyming i musklane, noko som kan bidra til betre regenerasjonsprosessar.

RESTITUSJON: Fysioterapeut og massør Jedrek Ksiazkiewicz meiner kopping kan ha stor effekt på restitusjonen, men at stor mengde kan vere belastande for kroppen.

Likevel er han tvilsam til den mengda koppar som er i bruk i dette tilfellet.

– Eg har aldri sett så mange koppar brukt samtidig. Etter mi meining kan ei så stor mengde vere ganske belastande for heile kroppen.

Harald Markussen i Olympiatoppen legg denne type restitusjon i kategorien «alternativ» behandling.

– Så vidt eg veit, så er dei studia som er gjort, og som viser små effektar på smertetilstandar, av låg kvalitet og gjerne gjort av dei same personane som tilbyr denne type behandling. Store oversiktsstudium av god kvalitet viser ingen effekt.

OLYMPIATOPPEN: Harald Markussen i Olympiatoppen er skeptisk til koppe-behandlinga som Openda fekk utført.

Olympiatoppen seier dei ikkje tilbyr denne typen medisinsk behandling på grunn av manglande dokumentasjon på effekt.