Herold

Eg er utflytta sunnfjording frå Sande, og eg vitjar ofte heimbygda. Difor vart eg oppriktig sjokkert då eg fekk vite at politikarane i Sunnfjord kommune vurderer å kutte stilling ved Sande bibliotek, som er ein del av Sunnfjord bibliotek. Eit slikt kutt vil i praksis rasere bibliotektilbodet for innbyggjarane i tidlegare Gaular kommune.

Sande bibliotek er i dag eit levande, godt og framtidsretta bibliotektilbod. Det er ein viktig møteplass i bygda, med varierte og spennande arrangement, ofte i samarbeid med lokale lag og organisasjonar. Biblioteket har eit tydeleg fokus på berekraft, samhald og kunnskapsdeling – verdiar som kommunen elles seier dei vil styrke.

Å tru at ein kan drive bibliotek utan personale, er ein illusjon.Utan fagfolk på jobb blir biblioteket redusert til eit dødt boklager. Alle aktivitetar for barn og unge vil forsvinne. Samarbeidet med skule og barnehage vil falle bort. Arrangement, leselyst, rettleiing og formidling – alt dette kviler på menneske, ikkje på hyller.

I haust var eg så heldig å delta på eit fantastisk bokarrangement på Sande bibliotek med dei nasjonalt anerkjende forfattarane Gaute Heivoll og Kjersti Annesdatter Skomsvoll. Det var ein litterær samtale på høgt nivå, eit tilbod ein ikkje kan ta for gitt i distrikta. Kvelden vart runda av med kveldsmat i samarbeid med Sogelaget. Slike møte skaper fellesskap – og dei skjer nettopp fordi biblioteket er ein aktiv aktør i bygda.

Og dette er ikkje enkeltståande døme. Berre denne veka har biblioteket hatt ekstra fokus på berekraft, eigenberedskap, natur og praktisk handverk. På Sande har ein hatt besøk om bunadstell, eit prosjekt med barnehagen der barn lærer å dyrke mat på berekraftig vis i samarbeid med SAMhagen, og ein inviterer til plantebyte for heile bygda. Dette er lågterskeltilbod som styrkjer kunnskap, fellesskap og lokal beredskap.

I ei tid der mange kjenner på einsemd, uro og avstand, treng vi fleire – ikkje færre – møteplassar. Biblioteket er ein godt etablert, inkluderande og gratis arena for fellesskap. Det er viktig for barn og unge, for eldre, for tilflyttarar og for oss som har flytta ut, men framleis kjenner tilknyting til bygda.

Å kutte i bibliotektilbodet på Sande er kortsiktig og vil gå utover alle som bur der.

For mi eiga del merkar eg at slike kutt får heilt konkrete konsekvensar. Å byggje ned bibliotek- og kulturtilbodet gjer at lysta til å flytte heim att til Sunnfjord blir mindre, ikkje større. Eit dårleg bibliotek- og kulturtilbod er heller ikkje noko som trekkjer til seg nye innbyggjarar. Tvert imot er det nettopp levande møteplassar, kulturtilbod og kunnskapsarenaer som gjer distrikta attraktive for barnefamiliar, unge vaksne og folk som vurderer å busetje seg i kommunen. Når ein svekkjer dette, svekkjer ein også framtidstrua i lokalsamfunna.

Eg håpar difor politikarane i Sunnfjord kommune tenkjer seg grundig om før dei gjer eit vedtak som det vil ta mange år å reparere.

Biblioteket er ikkje ei utgift. Det er ei investering i menneske, i fellesskap – og i framtida.