Herold

Birger-Tore, populært kalla Biggen, døydde 8.april, 82 år gammal. Han var ein svært dedikert tilhengar av Florø sportsklubb, og han la ned ein stor innsats gjennom mange år for klubben han var så glad i. Biggen måtte operere ein fot i ung alder, så han blei aldri veldig god som fotballspelar, men det tok han igjen på andre område.

Han var leiar i arrangementskomiteen i 1963, leiar i handballgruppa i 1966, leiar i fotballgruppa 1984, og nestleiar i hovudstyret i 1988. Han fekk klubbens hedersteikn i sølv i 1985, og fotballkretsens blå diplom i 1987.

Han varoppmann for a-laget i mange år, m.a. frå 1977-1978, og frå 1981-1986. Trenar var Rune Titlestad i dei sesongane, og Rune meiner at Biggen var ein avgjerande tilretteleggar for alt som måtte vere på plass utanfor bana. Han var derfor sterkt medverkande til den sportslege framgangen laget hadde, krona med opprykk til 3.divisjon for første gang i 1985.

Biggen var også ein flittig kretsdommar i mange år. Han var fast gjest på tribunen på alle Florø sine heimekampar, og på tallause kampar i aldersbestemte klassar. Med sitt gode humør, sine lune replikkar og solide kunnskapar, var han ein viktig miljøskapar i klubben.

Vi lyser fred over Birger-Tore Stavang sitt minne.