Herold

Ungdomsrådet i Årdal stiller seg svært kritisk til forslaget om å legge ned studiespesialiserande utdanningsprogram ved vidaregåande skule i kommunen. Vi meiner dette er eit alvorleg feilgrep som vil få store konsekvensar for både ungdommane i Årdal og for utviklinga av lokalsamfunnet.

Studiespesialiserande er eit heilt sentralt tilbod for ungdom som ønskjer å ta høgare utdanning. Å fjerne denne moglegheita lokalt vil i praksis tvinge elevar til å flytte heimefrå i ein tidleg fase av livet. For mange vil dette vere ei stor belastning. Både sosialt, emosjonelt og økonomisk. I ein periode der ungdom treng stabilitet, tryggleik og støtte frå nærmiljøet sitt, vil ei slik endring kunne svekke både trivsel og læringsutbytte, spesielt for dei som ikkje ynskjer å flytte.

Vidare vil ei nedlegging redusere valfridomen til ungdommane i Årdal. I staden for å kunne velje utdanning ut frå eigne interesser og mål, vil fleire bli pressa over i tilbod som ikkje nødvendigvis passar dei. Dette kan føre til lågare motivasjon, svakare faglege prestasjonar og auka risiko for fråfall i vidaregåande opplæring, noko som strir mot nasjonale mål om å få fleire til å fullføre og bestå.

I tillegg til elevane som blir ramma av dette, må ein også tenkje på arbeidsplassane som blir fråtatt og antal personar som står igjen utan jobb. Mange av desse har etablert seg her i Årdal og må flytte dersom dei vil behalde same jobbstilling.

Konsekvensane av ei nedlegging strekkjer seg langt utover skulekvardagen. Eit breitt og variert skuletilbod er avgjerande for å oppretthalde eit levande og attraktivt lokalsamfunn. Dersom studiespesialiserande blir fjerna, vil det kunne gjere Årdal mindre attraktiv for barnefamiliar, og på sikt bidra til fråflytting og svekt rekruttering av kompetanse til lokalt arbeidsliv.

Ungdomsrådet meiner det er eit grunnleggjande prinsipp at ungdom skal ha like moglegheiter til utdanning, uavhengig av kvar i landet dei bur. Ei nedlegging av studiespesialiserande i Årdal vil bryte med dette prinsippet og bidra til aukande sentralisering og ulikskap.

På denne bakgrunnen oppmodar ungdomsrådet på det sterkaste om at studiespesialiserande utdanningsprogram i Årdal blir vidareført. Å investere i ungdommen er å investere i framtida til heile lokalsamfunnet.