Herold

Sogn og Vestland samarbeider om å utvikle og omstille industrimiljøet i Årdal, med fokus på kompetanse, rekruttering og å skape nye arbeidsplassar. Dette arbeidet er avhengig av eit framtidsretta opplæringstilbod. Å kutte 30 av 57 elevplassar på VG1 ved Årdal vidaregåande skule er ikkje ei justering, men eit strukturgrep med alvorlege negative konsekvensar.

Studiespesialiserande tilbod ved Årdal vidaregåande skule er avgjerande for å sikre eit samla og mangfaldig skuletilbod i Sogn. Kutt på studiespesialiserande retning vil svekkje det heilskaplege tilbodet i regionen. Klassen er særleg viktig for den strategiske satsinga på fleire jenter i realfag og teknologi i Sogn.

Vidaregåande opplæring må tilpassast både mindre ungdomskull og framtidige kompetansebehov. I Sogn har vi gjort det, i fellesskap og over lang tid. Skulane i regionen har omstilt seg gjennom færre skular, færre klassar og meir tilpassa tilbod, med eit tydeleg blikk mot framtida.

I arbeidet har vi sett på eit samla tilbod, og korleis skulane kan utfylle kvarandre. Skulane i Sogn må ikkje setjast opp mot kvarandre. Skal truverdig og berekraftig justering av elevplassar i Vestland lukkast, må dette skje der dekninga er høgare enn i Sogn.

Sogn er den einaste vidaregåande regionen i Vestland utan forventa elevnedgang dei neste åra. Likevel viser prøveinntaka ein svært pressa kapasitet. To ekstra Vg1-klassar i Sogndal reduserer ventelistene noko, men kapasiteten er framleis tett opp mot full. Dette er for høgt, og gir ungdom i Sogn mindre fleksibilitet enn i resten av fylket.

Det er riktig å opprette dei ekstra klassane i Sogndal. Utan desse ville Sogn hatt eit klart underskot på elevplassar. Men nettopp fordi regionen allereie er stramt dimensjonert, er det uansvarleg å ta vekk ein klasse i Årdal.

Konklusjonen er enkel: Auke i Sogndal er nødvendig. Kutt i Årdal er feil.