Herold

Den vanskelege situasjonen for villreinen er nettopp eit resultat av total mislykka lokal forvaltning.

Tiltaksplanen for villreinen på Hardangervidda lar venta på seg. Det er eit dårleg teikn. Mykje tydar då på at departementet arbeidar med unntak og dispensasjonar for visse brukarar av vidda, td slike som turistar og private. Viss det vert slik at nokon skal få spesialhandsaming i høve til andre, vil planen vera utan verdi, og då spesielt for reinsdyra. Her er det viktig at alle er med på dugnaden.

Slik situasjonen er i dag vert villreinen på Hardangervidda systematisk plaga og forstyrra sommar som vinter. Til no har både lokale og sentrale myndigheiter gjort lite eller ingen ting for å bøta på dette. Spesielt har lokale kommunestyre og fjellstyre synt ei utruleg passiv haldning. Berre i passande høve står dei brått fram som verdsmeistrar og kjem med ekspertuttalelsar utan rot og fot. At dei no iflg. statssekretæren i miljødepartementet skal få endå meir mynde i høve forvaltning av villrein og vidde, teiknar ikkje godt. Den vanskelege situasjonen for villreinen er nettopp eit resultat av total mislykka lokal forvaltning.

Skal situasjonen for villreinen på Hardangervidda verta tydleg betre må følgande tiltak vektleggjast:

1. Totalt ferdselsforbod i nasjonalparken frå helga etter påske og fram til fiskesesongen startar 1. august. Ingen har noko på vidda å gjera i denne perioden

2. Nedlegging av turistaksen Haukeliseter – Hedlevass – Hadlaskar. Fysisk fjerning av turisthyttene og tomtene slettast til

3. Jaktforbod i minst 5 år. Jakta er ein ekstremt stressande periode for villreinen

4. Kontrollert innføring av rovdyr, dvs. jerv. Jerven er ein heilt naturleg predator der det er villrein, og plukkar effektivt ut gamle, sjuke og såra dyr.

5. Kraftig reduksjon av sau i nasjonalparken. Sau og rein kjempar om same matfatet, og det er villreinen som er det naturlege dyret på Vidda.

6. Slutt med kunstig gjeting av villreinen, jf. det som skjer på Haukeli og Nord-Hardangervidda. Cowboyane i SNO kan tildelast andre og meir viktige oppgåver

7. Oppretting av eit nasjonalparkstyre slik det er i alle andre nasjonalparkar i Noreg

8. Kraftig reduksjon i motorisert ferdsel både i lufta og på bakken

Viss det no syner seg at tiltaksplanen munnar ut i eit lappverk av dispensasjonar og unntak for kreti og pleti, bør villreinstamma skytast ut slik det vart gjort i Nordfjella for ni år sidan. Dyreplageriet av villreinen må ta slutt og frykta for fleire CWD- tilfelle er dermed over. Overordna styresmakter må visa kor skapet skal stå, og endeleg innsjå at denne gongen er det villreinen som skal prioriterast og ikkje ein overdriven turisttrafikk.