Herold

Bremanger får 400.000 kroner frå Miljødirektoratet til utforminga av ein eigen kommunedelplan for naturmangfald.

I januar søkte kommunen om pengar til ein slik plan, og no varslar Miljødirektoratet at dei får 400.000 kroner. Dei søkte om pengar til: "utarbeiding av kommunedelplan for naturmangfald. Formålet med planen er å etablere ein betre oversikt over kunnskapsgrunnlaget og utarbeide ein strategi for å sikre ivaretaking av naturverdiane i framtida."

–Miljødirektoratet vurderer at søknaden er utforma i tråd med mål for tilskotsordninga. Utarbeiding av kommunedelplan for naturmangfald vil bidra til å styrkje arbeidet i kommunen med å vareta naturmangfaldsverdiane, skriv direktoratet.

Temaplan for naturmangfald er eit verkemiddel for å setje naturmangfaldet på den lokalpolitiske dagsordenen og etablere ein lokal forankring og medverknad i utveljinga av viktige naturområde i kommunen, peikar direktoratet på.

Eit av krava frå direktoratet er at planarbeidet må ha ein prosess med medverknad og lokalpolitisk forankring tilsvarande ein kommunedelplan. Planarbeidet skal vere igangsett i løpet av 2026, og det er forventa at naturmangfaldsplanen skal vere klar til vedtak innan mai 2028.

Viss planprosessen krev meir tid som følgje av medverknadsprosessar, lengre høyringsperiode og den politiske behandlinga, må kommunen varsle Miljødirektoratet og sende inn revidert forpliktande tidsplan, slår direktoratet fast.

Miljødirektoratet fekk inn 434 søknadar til støtteordninga Natursats i 2026, og 19 av desse var søknadar til utarbeiding av kommunedelplanar for naturmangfald. Formålet med ordninga er å bidra til å vareta og betre tilstanden for naturmangfald i kommunen.