Smell for samarbeidslaget: – Avslutningane sit ikkje som dei skal
Plus
Ingen god start for samarbeidslaget NBK/Kvernbit i sesongdebuten i 4. divisjon. Nymark drog frå Knarvik med 3–0 i bagasjen.
4. divisjon. kvinner
NBK/Kvernbit – Nymark 0–3 (0–2)
NBK/Kvernbit viste brukbare takter og hadde initiativet i den første halvtimen. Men gjestane gjorde kort prosess med to skåringar i sluttminuttane av omgangen.
Og etter kvilen plussa Nymark på til 3–0 frå straffemerket.
– Vi får til spelet vårt i 1. omgang, og skapar ein god del. Men vi klarar ikkje å omsetja sjansane, oppsummerer Anna Oline Harnes, målvakt og assistenttrenar. Ho var svært nær ved å få fingertuppane på straffa.
Lokalfotballekspert David Flatøy seier dette om kampen.
– Eit redusert Nymark-lag vinn komfortabelt. Bergenslaget er tøffare i begge 16-metrane.
Han trur Nymark nok er ein av opprykkskandidatane. Laget vann sin første kamp 7–0 mot Bergen Nord.
Har litt å gå på
Hovudtrenar Thomas Rønn-Aar har dette å seie om samarbeidslaget sin første offisielle kamp heime i Knarvik.
– Avslutningane sit ikkje som dei skal.
På den andre sida synest han Nymark fekk maksimalt betalt på sine to avslutningar på mål i 1. omgang.
Både David Flatøy og Rønn-Aar framhevar Solveig Brunborg sin innsats som spiss, særleg før pausen. NBK/Kvernbit-trenaren trekker også fram laget sin høgre back, Elina Wiik.
I treningskampane er det Susanne Leikvoll som har notert seg flest gonger på skåringslista, og ho leverte eit par gode forsøk også i opningskampen.
Mange unge i troppen
– Vi har fleire spelarar som kan finna vegen til nettmaskene, seier NBK/Kvernbit-trenaren.
Han fortel om ein god treningsleir på Karmøy, og forsikrar at det absolutt er god kjemi og harmoni i det ferske samarbeidslaget.
Rønn-Aar er også godt tilfreds med frammøtet på trening.
NBK/Kvernbit har mange unge og talentfulle spelarar i troppen. Laget starta med berre med fem seniorspelarar, resten kom frå J16 og J19-laget.
– No er det berre å bretta opp ermene til midtveke-kampen borte mot Osterøy, seier NBK/Kvernbit-trenaren.
Osterøy vann sin første kamp 3–0 borte mot Lyngbø 2.
Smartembed for https://livecenter.nifs.no/module/table/1/701206/?hideSearch=1&theme=light&height=800