Herold

Dette går direkte imot skulestyresmaktene sitt eige fokus på gjennomføring og fråfall, skriv tillitsvald ved Knarvik vgs., Stig Solberg.

Som tillitsvald ved Knarvik vidaregåande skule ser eg med stor uro på framlegget frå opplæringsdirektøren om det framtidige skuletilbodet frå og med skuleåret 2026/27.

Ifølgje innstillinga skal éin av tre klassar på vg2 studiespesialisering leggjast ned frå hausten 2026 – stikk i strid med behovet ved skulen og lovnadene vi har fått. Dette skjer trass i at søkinga er god, og at det er meir enn nok søkjarar til å oppretthalde tre klassar.

Utviklinga vi no ser ved Knarvik vidaregåande skule, er eit mønster vi kjenner att frå Sotra og Os. Ved begge desse skulane er det i dag berre to parallellar på studiespesialisering, og no er det same i ferd med å skje i Knarvik. I den samanhengen er det naturleg å spørje om fylket ønskjer ei utvikling der tilbodet på studiespesialisering vert sentralisert til Bergen, medan distrikta må klare seg med eit minimumstilbod.

Store konsekvensar for fagtilbodet

Nedbygginga av tilbodet på Knarvik vil få konsekvensar for kva vi kan tilby elevane av fagtilbud. Ein vanleg tommelfingerregel er at ein skule treng minst tre parallellar på kvart trinn for å sikre eit breitt utval av programfag.

Med tre klassar har elevane høve til å velje dei faga dei faktisk er interesserte i, ikkje berre eit avgrensa utval. I tillegg vil ei nedbygging påverke fagmiljøet, som er avgjerande for å utvikle faga og det profesjonelle læringsfellesskapet ved skulen.

Elevane vert skadelidande

For elevane betyr kuttet i talet på klassar at gode klassemiljø vert splitta opp. Det fører òg til at mange elevar som bur i Alver, må reise til Bergen for å fullføre utdanningsløpet sitt. Det er elevane med lågast karakterpoeng som no ikkje får halde fram på vg2 i Knarvik – nettopp dei elevane som kanskje har størst behov for å gå på nærskulen sin.

No må elevar risikere å reise i over ein time for å kome seg til ein skule i byen, der dei møter eit miljø som allereie er etablert, og der dei gjerne ikkje kjenner nokon frå før. Dette går direkte imot skulestyresmaktene sitt eige fokus på gjennomføring og fråfall.

Brotne lovnader

Hausten 2025 vart vi lova av hovedutvalget for opplæring og kompetanse at vi skulle få behalde tre klassar fram til 2027. Denne lovnaden vart broten allereie i fjor då utvalget valde å leggje ned ein vg2-klasse. Vi hadde håpa på ein betre prosess i år, men diverre fekk vi same beskjed for årets vg2-kull.

Vi håpar at dei politiske partia i fylkestinget ser at denne endringa er unødvendig, og at dei lèt oss behalde tre vg2-klassar neste år. Eit godt tilbod på studiespesialisering bør ikkje berre vere eit byfenomen.

Ved Knarvik vidaregåande skule har vi elevgrunnlaget som skal til for å oppretthalde eit likeverdig tilbod. Dersom søkinga ikkje gir grunnlag for tre klassar frå 2027, kan vi forstå at ein klasse vert lagd ned, men gi oss sjansen til å behalde breidda så lenge elevane faktisk er her.

Nordhordland fortener ein skule med eit breitt og godt fagtilbod, også på studiespesialisering.