Herold

Kvernbit står med full pott og 12–3 i målprotokollen etter dei to første kampane i 5. divisjon. På si side beit Austrheim og Radøy godt frå seg mot opprykkskandidatar, men står med null i potten så langt.

Etter 7–3 i opningskampen heime, fortsette Kvernbit skåringsfesten med 5–0 mot NHH-studentane.

– Ein OK kamp mot eit utruleg svakt NHHI 2-lag. Kvernbit har kontroll på kampen og viser breidde i troppen med fleire nøkkelspelarar ute, oppsummerer fotballekspert David Flatøy. Han peikar på at laget må jobba meir med utspel-fasen.

Magnus Solvi-Neverdal sette inn to fulltreffar før pause. Først i det 80. minutt kom 3-0, signert Jonah Elan Banks. Heilt i sluttminuttane plussa Andreas Hopland Larsen og Filip Pavlovic på til 5–0.

Gav Løv-Ham eit skremmeskot

Radværingane gav opprykksspådde Løv-Ham, med Fredrik Haugen (tidlegare Brann) i spissen, eit skremmeskot.

– Poeng i Fyllingsdalen var ikkje noko Radøy hadde med i rekneskapen før sesongen. Dette er noko å bygga vidare på etter «flausen» mot Tertnes i opningskampen, seier lokalfotball-ekspert David Flatøy.

Han legg til at kampen mot Arna-Bjørnar2 søndag om ei veke er ein nøkkelkamp for radværingane.

Jon Halstein Tjore i Radøy-teamet konstaterer god forbetring etter den svake opningskampen. Heimelaget sine skåringar kom i slutten av 1. omgang og like etter kvilen.

– Vi var nær ved å få med oss poeng mot eit opprykksspådd Løv-Ham. Men ein tabbe på 2-0, pluss at vi brente ein enorm sjanse i 2. omgang, gjorde at det vart eit knipent tap. Løv-Ham vart temmeleg stressa mot slutten av kampen etter Radøy si redusering, signert Isak Johan Friis Thomassen.

– Vi noterer oss ein god prestasjon, seier han.

Måtte kjempa hardt mot Austrheim

Opprykkskandidat Vadmyra måtte kjempa hardt for å ta med seg alle poeng i bortemøtet med Austrheim.

Vadmyra vann opningskampen med store siffer, og Austrheim fekk ein smell borte mot Fotlandsvåg, var det grunn til å tru at heimelaget kunne få det tøft.

Men Austrheim gav ikkje ved dørene i dei mange duellane, og heldt gjestane til 0–0 ved pause.

Etter gjestane sine to skåringar i første del av andre omgang, fekk Vadmyra naturleg nok eit visst initiativ i kampen, men utan at Austrheim på nokon måte kapitulerte.

Og heilt i sluttminuttane reduserte Sindre Sætre på straffespark, og heimelaget slåst for utlikning.

Den første seriekampen i Austrheim blei spelt på kunstgraset ved idrettsparken. Når våren varmar på er planen å flytte kampane til graset ved samfunnshuset.

– Graset i Austrheim må snart bli grønt, slik at dei kan begynna å plukka viktige heimepoeng. Det er mykje talent i laget, men så langt med lite sluttprodukt, oppsummerer David Flatøy.

Smartembed for https://livecenter.nifs.no/module/table/1/701203/?hideSearch=1&theme=light&height=800