Herold

Du kjenner att kjensla. Noko gale kjem til å skje, som ikkje burde skje, i alle fall ikkje enno. Kvifor får ein ofte denne «vondt i magen» kjensla når det er snakk om store, strategiske val i Kvinnherad? Er vi på veg inn i same fella som fleire gonger før, der ei viktig avgjersle vert tatt først, utan skikkeleg fagleg grunnlag – og argumenta konstruert i ettertid?

Det kan vera mange gode grunnar til at vi vil ha datasenter i Kvinnherad. Hugs at vi er på seljar-sida i ei slik sak! Men å invitera inn den første og beste som melder seg i ei så viktig avgjersle er lite klokt, slik fleire har bemerka. Om ein legg eit minimum av bedriftsøkonomisk teori og praksis til grunn for korleis ei sak som dette bør handsamast, er det ikkje forsvarleg.

Ei kort oppmoding: Grei ut spørsmålet skikkeleg først og få ein truverdig konsekvensanalyse på bordet til kommunestyret. Vil politikarane då gå vidare med etablering av datasenter, vil det melda seg langt fleire og meir seriøse interessentar enn dei to som er på banen no. Det kan eg garantera!

Det kan henda at ulempene vert vurderte som større enn fordelane, og då er det lov å seia nei. Men utan ei grundig utgreiing og konsekvensanalyse vert det å stola på magekjensla. I denne saka er mi temmeleg vond!