Herold

– Fylkeskommunen og kommunane treng å høyra korleis innbyggjarane har det for å gjera fylket til ein endå betre stad å bu og leva, seier fylkesordførar Jon Askeland.

Torsdag går invitasjon til å delta i den store folkehelseundersøkinga 2026 ut til over 222.000 utvalde innbyggjarar i Vestland. Målet er å skaffa meir kunnskap om korleis vestlendingane har det. Svara skal brukast til å forma det framtidige folkehelsearbeidet.

Det er Vestland fylkeskommune som står bak undersøkinga, i tett samarbeid med Folkehelseinstituttet (FHI) og dei lokale kommunane.

Dette er ei viktig moglegheit for innbyggjarane til å fortelja om helse og livskvalitet, noko som vil danna grunnlag for politiske avgjerder i åra som kjem. Fylkesordførar Jon Askeland understrekar kor avgjerande deltakinga er:

– No håpar vi så mange som mogleg tek seg tid til å svara. Fylkeskommunen og kommunane treng å høyra korleis innbyggjarane i Vestland har det for å gjera fylket til ein endå betre stad å bu og leva, seier Askeland i ei pressemelding.

Ny digital løysing – pass på svindel

I år blir folkehelseundersøkinga for første gong gjennomført digitalt via Helsenorge. Dei 222 054 utvalde vestlendingane vil få invitasjon direkte til den føretrekte varslingskanalen sin i Helsenorge, anten via SMS, e-post eller begge delar.

Det er viktig å merka seg at invitasjonen ikkje vil innehalda ei lenke. For å svara må deltakarane logga seg inn på Helsenorge med BankID. Prosjektleiar Mie Dahl Pind i Vestland fylkeskommune kjem derfor med ei åtvaring:

– Dersom nokon opplever å få invitasjon med lenke, kan dette vera svindel. Generelt er det ein god regel å aldri trykka på lenker du får tilsendt på SMS eller e-post, gå heller inn på dei offisielle nettsidene. I dette tilfellet vil det vera Helsenorge, opplyser Pind.

Sjølve undersøkinga skal vera enkel og trygg å fylla ut, og tek om lag 20–25 minutt. Alle svar blir handsama i tråd med gjeldande personvernreglar, slik at ingen enkeltpersonar kan kjennast att i dei publiserte resultata.

Fokus på klima, beredskap og økonomi

I tillegg til tradisjonelle spørsmål om helse, nærmiljø og livskvalitet, vil undersøkinga også kartlegga vestlendingane sitt syn på eigenberedskap og korleis dei trur klimaendringar vil påverka framtida. Dette er relevante og tidsaktuelle tema som kan gje verdifull innsikt.

Eit spesielt fokus vil ligga på økonomiske vanskar, eit tema som har fått auka relevans i ei tid med prisauke på «alt». Ved førre undersøking i 2022 rapporterte 19,2 prosent av dei som svara at dei hadde økonomiske vanskar.

Fylkesordførar Askeland seier han er spent på å sjå korleis tala har utvikla seg.

– Vi er spente på korleis Vestland ligg an. Med den auken vi har sett i mat- og energiprisar den siste tida, ventar vi ein auke også her i fylket. Svara i undersøkinga vil gje oss viktig kunnskap. Det er også viktig å få innsikt i moglege skilnader mellom dei ulike delane av fylket, slik at vi kan arbeida for trygge, attraktive og livskraftige lokalsamfunn i heile Vestland, seier han.

Resultata frå folkehelseundersøkinga skal danna grunnlaget for det vidare folkehelsearbeidet, både lokalt i kommunane og på regionalt nivå i fylket.