Herold

Elevane ved Voss vidaregåande skule presterer på høgt nivå i konkurransar innan restaurant- og matfaget.

Det er ikkje måte på topplasseringar elevane har drege med seg heim dei siste månadane:

• I den nasjonale konkurransen Tine MatCup kom laget til Voss (Sara Christensen Knapstad, Sigrid Krangnes og Hanne Oldervoll) heilt til finalen av 60 lag, og vann prisen for minst svinn/berekraft.
• I same konkurranse vart Sara Christensen Knapstad kåra til konkurransen sin beste kokk.
• Bakar- og konditorelevane, høvesvis Irene Aarhus og Kaia Herland, tok sylv i fylkesmeisterskapet i sine fag.
• I fylkesmeisterskapet for kokk og servitør gjorde Sara Christensen Knapstad (kokk) og Volodymyr Topolnytskyi (servitør) reint bord, det vil seia at dei begge skal til NM i neste veke.

– Har brukt mykje tid på dette

– Det er ei oppleving me kjem til å ta med oss, seier Sigrid.

Ho var med i TineMatCup saman med Sara og Hanne. Dei to fyrstnemnde som kokk, og Hanne som servitør.

I oppgåva deira skulle dei setja saman ein tre-rettars meny, ein fiskerett til forrett, ein vegetarhovudrett og ein dessert som inneheldt eple og brunost.

– Det var litt utfordrande at hovudretten ikkje var kjøt eller fisk, at ein må finna fram andre måtar å få fram gode smakar. Det vart mykje prøving og feiling, seier Sara.

– Det var veldig kjekt å kunna utvikla ein meny åleine, seier Sigrid.

Kniva seg til finalen: – Me vart sjokkerte!

Hanne seier ho ikkje var så veldig nervøs i konkurransen.

– Eg gjekk inn i sonen, og gjorde det eg skulle.

– Ein går litt inn i ei boble, med fullt fokus på å gjera det me har øvd på, stemmer Sara i.

Dei har øvd ganske mange timar utanom skuletid opp mot konkurransen.

– Me har brukt mykje tid og energi på det, men eg trudde ikkje me skulle koma så langt. Det var 60 lag som melde seg på, så gjekk me frå 30 til seks lag i finalen. Det er veldig kjekt, når me har jobba så mykje med det, seier Sara.

Lærerike konkurransar

Kaia er elev i konditorfaget, og har vore med på både Rogalandsmesterskapet og fylkesmeisterskapet.

Her har ho jobba med tema som Hollywood og babyshower i konkurransane.

Her vart det bakt kake inspirert av Mamma Mia, og kake som avslørar kjønnet på ein ufødd baby med kva fargen moussen inni kaka har.

– Eg har lært mykje i desse konkurransane, seier ho.

Dei andre stemmer i.

Konkurransane er gode førebuingar til eksamen, og ser dessutan veldig bra ut på CV-en når dei no landar læreplassar.

Sigrid, som trudde ho berre skulle gå to år for så å ta påbygg og studiekompetanse, har no landa lærekontrakt på ein fin restaurant i Trondheim, To Rom og Kjøkken.

– Det hadde eg aldri sett for meg.

Bakarelev Irene var også med på fylkesmeisterskapet.

Ho måtte bryna seg på både søt og usøt deig, og levera eksakt tal produkt som alle skulle vega eit visst tal gram.

Ho har vore interessert i baking heile livet.

– Dette er litt annleis enn å sitja på skulebenken heile dagen. Det er veldig fint at me får vera kreative i det me driv med.

Sara og Volodymyr deltok også på eit fylkesmeisterskap som kokk og servitør.

Dei skal vidare til NM, og konkurrerer torsdag neste veke.

Volodymyr seier han var veldig nervøs på førehand. Han måtte mellom anna ferdigstilla ein rett framfor dei som skulle eta.

– Det vart veldig bra. Eg fekk tilbakemelding på at eg ikkje såg nervøs ut i det heile teke, og fekk skryt for det gode samarbeidet eg hadde med kokken, Sara.

Sara seier at ho som kokk må ta inn i planlegginga at det ikkje skal verta for vanskeleg for servitøren, og oppgåvene han hadde.

Når dei skal til NM vert det ei ny utfordring, då skal dei ikkje samarbeida med kvarandre, men med andre dei ikkje veit kven er.

– Me er veldig heldige som har fått jobba mykje saman om dette på skulen. Det vert veldig annleis neste veke.

Stort engasjement i klassen

Dei er 12 elevar som går i VG2-klassen saman.

Gjengen som er med å konkurrerer utgjer dermed halvparten av gjengen.

– Kvifor trur de at det er så mange av dykk som gjer det så godt?

– Det er eit stort engasjement for yrket, seier Kaia.

– Lærarane hjelper oss mykje, seier Sigrid.

– Det held oss opptekne, og det trur eg er bra, legg Volodymyr til.

Dei seier at dei får mykje fridom til å øva og jobba med det dei sjølv ynskjer, og trur det har mykje å seia for engasjementet deira.

– At me har fått lov til å vera såpass kreative. Om me ynskjer å jobba med ein spesifikk råvare ein dag, og bruka dagen på å utvikla ferdigheitene kring dette, så får me det. Lærarane er veldig støttande i det me driv med.

Fagansvarleg for Restaurant- og matfag ved skulen, Terje Røssland, har same oppfatning som elevane over kvifor dei hevdar seg slik.

– Dei får tid nok til å øva, gjenta og utfalda seg. Har dei motivasjonen og viser at dei vil satsa på dette, så gjer me det me kan for å leggja til rette for det, seier han og legg til:

– Ein kan gjerne tenkja at det gjer at dei går glipp av noko anna, men såpass mykje innprenting og øving kan dei dra nytte av i andre samanhengar, og er eit pluss. Det synest me er gull verdt, og me ser veldig positivt på dette engasjementet i vår avdeling.

No har dei tilsett ny rektor på Voss vidaregåande skule

Anders starta sitt eige firma på 18-årsdagen

Anders (15) investerer konfirmasjonspengane i musikkdraumen: – Vil bli popstjerne!